సౌదీ అరేబియాకు చమురు దెబ్బ, భారీగా తగ్గిన నిల్వలు.. అప్పులే గతి!
కరోనా మహమ్మారి కారణంగా ప్రపంచవ్యాప్తంగా అన్ని దేశాల ఆర్థిక వ్యవస్థలు కుప్పకూలుతున్నాయి. కరోనా కారణంగా ఓ వైపు డిమాండ్ లేక చమురు ధరలు తగ్గాయి. మరోవైపు ఆయా దేశాల్లో స్టోరేజ్ నిల్వలు పెరిగిపోయాయి. దీంతో చమురు ఉత్పత్తి దేశాల పరిస్థితి దిగజారిపోయింది. ఇప్పటికే ఉత్పత్తి తగ్గించాలని ఒపెక్ సహా చమురు ఉత్పత్తి దేశాలు నిర్ణయించాయి.
మిడిల్ ఈస్ట్కు చమురు ధరల దెబ్బ: ఇదీ ఇరాక్, సౌదీ దేశాల పరిస్థితి, ఆ దేశాలు చిన్నాభిన్నం
2011 తర్వాత కనిష్టానికి నిల్వలు
మార్చి నెలలో సౌదీ అరేబియా ఫారెన్ అసెట్స్ 2000 తర్వాత తొలిసారి వేగంగా తగ్గిపోయాయి. దీనిని బట్టి చమురు ధరల క్షీణత వల్ల ఉత్పత్తి దేశాల ఆర్థిక వ్యవస్థపై ఏ మేరకు నష్టం జరిగిందో అర్థమవుతోందని చెబుతున్నారు. బ్లూమ్ బర్గ్ కథనం ప్రకారం 100 బిలియన్ రియాల్స్ (27 బిలియన్ డాలర్లు) తగ్గి నిల్వలు 464 బిలియన్ డాలర్లకు పడిపోయింది. 2011 తర్వాత అత్యంత కనిష్టం.
ఖర్చులు తగ్గించుకుంటూ..
గత వారం సౌదీ ఆర్థికమంత్రి మొహమ్మద్ అల్ జాదాన్ మాట్లాడుతూ... 120 బిలియన్ రియాల్స్ వరకు ఈ ఏడాదిలో తగ్గవచ్చునని చెప్పారు. ప్రపంచంలో అతిపెద్ద చమురు ఎగుమతిదారు అయిన సౌదీ ఖర్చులు తగ్గించుకునేందుకు ఎన్నో ప్రయత్నాలు చేస్తోంది. అయితే చమురు ధరలు దశాబ్దాల కనిష్టానికి పడిపోతుండటం వల్ల ఆర్థిక పరిస్థితి చిన్నాభిన్నమవుతోంది. సౌదీ నిల్వలు దాదాపు రెండు దశాబ్దాల కనిష్టానికి చేరుకుంటున్నాయి.
భారీగా నష్టపోతున్న చమురు ఉత్పత్తి దేశాలు
మార్చి నెలలో బ్రెంట్ క్రూడాయిల్ ధర 50 శాతం కుప్పకూలింది. ఆ రోజు నుండి ఇప్పటి వరకు మరింతగా పడిపోయింది. బ్యారెల్ 20 డాలర్ల వద్ద ట్రేడ్ అవుతోంది. సౌదీ అరేబియా తన బడ్జెట్ను సమతౌల్యం చేసుకోవాలని ఇంటర్నేషనల్ మానిటరీ ఫండ్ సూచించింది. సౌదీ సహా అన్ని చమురు ఉత్పత్తి దేశాలు క్రూడాయిల్ బ్యారెల్కు 50 నుండి 70 డాలర్ల వరకు అంచనా వేసుకొని బడ్జెట్ను రూపొందించుకున్నాయి. ఇప్పుడు 20 డాలర్లకు పడిపోవడమే కాదు. కనీసం సేల్ లేదు. దీంతో ఆర్థిక వ్యవస్థలు కుప్పకూలుతున్నాయి.
రెవెన్యూ షాక్
ప్రభుత్వం అంచనాల కంటే రెవెన్యూ భారీగా తగ్గనుందని, ఈ నేపథ్యంలో 220 బిలియన్ రియాల్స్ వరకు రుణాలు పెంచుకునే పరిస్థితిని పరిశీలిస్తున్నట్లు ఆర్థికమంత్రి తెలిపారు. ఇది తమ బడ్జెట్కు షాక్ అని అభిప్రాయపడ్డారు. సౌదీ అరేబియా ఇప్పటికే ఈ ఏడాది రెండుసార్లు అంతర్జాతీయ బాండ్ మార్కెట్ను చేరుకుందని, స్థానికంగా, అంతర్జాతీయంగా పెట్టుబడిదారుల నుండి 19 బిలియన్ డాలర్లు సేకరించింది.