ఇరాన్-అమెరికా టెన్షన్స్: డాలర్‌తో భారీగా నష్టపోయిన రూపాయి

ముంబై: అమెరికా-ఇరాన్ దేశాల మధ్య ఉద్రిక్తతల నేపథ్యంలో అంతర్జాతీయ మార్కెట్లు నష్టాల్లో కూరుకుపోయాయి. బంగారం, క్రూడాయిల్ ధరలు పెరుగుతున్నాయి. ఈ ప్రభావం ఆసియా మార్కెట్లపై కూడా పడింది. దీంతో భారతీయ మార్కెట్లో నష్టాల్లో ట్రేడ్ అయ్యాయి. చమురు ధరలు అంతకంతకు పెరగుతుండటంతో డాలర్‌తో రూపాయి మారకం విలువ సోమవారం 31 పైసలు తగ్గి 72.11 వద్ద ట్రేడ్ అయింది.

ఇరాన్ టాప్ కమాండర్ ఖాసీమ్ సోలేమని హత్యకు ఇరాన్ ప్రతీకారం తీర్చుకోవాలని చూస్తే భారీ మూల్యం చెల్లించుకోక తప్పదని అమెరికా అధ్యక్షులు డొనాల్డ్ ట్రంప్ హెచ్చరించారు.

అమెరికా-ఇరాన్ మధ్య పెరుగుతున్న ఉద్రిక్తతల కారణంగా ముడి చమురు ధరలు పెరుగుతున్నాయని ఫారెక్స్ ట్రేడర్స్ అంటున్నారు. సోమవారం ఇంటర్ బ్యాంక్ ఫారన్ ఎక్స్చేంజ్‌లో డాలర్‌తో రూపాయి 72.03 వద్ద ప్రారంభమైంది. ఆ తర్వాత కాసేపటికి 72.11కి పడిపోయింది. గత క్లోజింగ్ కంటే 31 పైసలు నష్టపోయింది. శుక్రవారం రూపాయి 71.81వద్ద క్లోజయింది. కాగా, అంతర్జాతీయంగా బ్రెంట్ క్రూడాయిల్ బ్యారెల్‌కు 70.59 (2.90 శాతం) పెరిగింది.