ఆ సీఈవో ఆఫీస్‌లో అడుగే పెట్టలేదు.. కానీ స్టాక్స్ 70% జంప్: అక్కడి నుండి కంపెనీ రన్

ముంబై: విప్రో స్టాక్స్ గత ఐదు నెలల కాలంలో 70 శాతం మేర లాభపడింది. కరోనా మహమ్మారి కారణంగా మార్చి నెలలో మార్కెట్లకు అనుగుణంగా ఈ స్టాక్ రూ.250 నుండి రూ.165 కిందకు పడిపోయింది. అన్-లాక్ తర్వాత మార్కెట్లు పుంజుకున్నాయి. గత రెండు మూడు నెలలుగా మార్కెట్లు జంప్ చేస్తున్నాయి. విప్రో స్టాక్ కూడా భారీగా ఎగిసింది. కేవలం 5 నెలల కాలంలో డెబ్బై శాతం ఎగిసింది. విప్రో స్టాక్స్ నేడు 0.58 శాతం నష్టపోయి రూ.358.70 వద్ద ముగిసింది. ఓ దశలో ఈ స్టాక్ రూ.377ని దాటింది.

కొత్త సీఈవో ఆఫీస్‌లో అడుగు పెట్టకుండానే..

కంపెనీ చీఫ్‌గా థియెర్రీ డెలాఫోర్ట్ బాధ్యతలు చేపట్టి 5 నెలలు అవుతోంది. ఫ్రాన్స్ ఐటి దిగ్గజం క్యాప్ జెమిని ఎస్ఈ నుండి విప్రోకు సీఈవోగా వచ్చారు. ఈయన వచ్చిన ఈ కొద్ది కాలంలోనే ఎక్స్చేంజీలో లిస్ట్ అయిన మిగతా ఐటీ దిగ్గజాల షేర్ల కంటే విప్రో అధికంగా లాభపడింది. ఇక్కడ మరో విషయం ఏమంటే ఆయన ప్యారిస్ నుండే విప్రో కార్యకలాపాలు నిర్వహిస్తున్నారు. సీఈవోగా బాధ్యతలు చేపట్టాక ఒక్కసారి కూడా బెంగళూరులోని విప్రో ప్రధాన కార్యాలయానికి రాలేదు. అంటే ఆఫీస్‌లో అడుగు పెట్టకుండానే ఆయన నేతృత్వంలో స్టాక్స్ జంప్ చేస్తున్నాయి.

లీడర్‌షిప్స్ పొజిషన్ల సంఖ్య 25 నుండి 4కు..

కరోనా నేపథ్యంలో కంపెనీపై ప్రభావం లేకుండా శాయశక్తులా కృషి చేస్తున్నారు. కస్టమర్లతోపాటు మేనేజర్లు, సిబ్బందితో వర్చువల్ సమావేశాలు నిర్వహిస్తున్నారు. విప్రోలో లీడర్‌షిప్ పొజిషన్ల సంఖ్యను 25 నుంచి నాలుగుకు తగ్గించారు. కంపెనీల కొనుగోళ్లకు ఆసక్తి చూపుతున్నారు. క్లయింట్స్‌తో 130కు పైగా సమావేశాల ద్వారా యూరోప్, అమెరికా నుండి మల్టీఇయర్ కాంట్రాక్ట్స్ దక్కించుకున్నారు. ఆయన హయాంలో ఇతర స్టాక్స్ కంటే విప్రో స్టాక్ భారీగా ర్యాలీ చేసిందని, ఇది ఆరంభమేనని, ఇంకా కొనసాగుతుందని అంటున్నారు.

ఆదాయాలు ఇలా..

మార్చిలో ముగిసిన ఆర్థిక సంవత్సరంలో స్థిర కరెన్సీలో ఆదాయం 3.6 శాతం పెరిగింది. ఇన్ఫోసిస్ లిమిటెడ్ 9.8 శాతం, టీసీఎస్ 7.1 శాతం పెరిగింది. రెండేళ్ల క్రితం విప్రోను వెనక్కి నెట్టి మూడో స్థానంలోకి వచ్చిన హెచ్‌సీఎల్ టెక్నాలజీస్ 17 శాతం వృద్ధి సాధించింది. 2016లో విప్రో పగ్గాలు చేపట్టిన అబిదబీ నీముచ్‌వాలా కంపెనీని పట్టాలెక్కించే ప్రయత్నాలు చేశారు. నాలుగేళ్లలో ఆశించన పురోగతిని సాధించలేకపోయారని అంటారు. 2020 నాటికి విప్రోను 15 బిలియన్ డాలర్ల సంస్థగా నిర్మించే ప్రయత్నాలు ఫలించలేదు. మార్చితో ముగిసిన త్రైమాసికంలో 8.1 బిలియన్ డాలర్లుగా ఉంది. కొత్త డీల్స్ కోసం డెలాఫోర్ట్ టీంను ఏర్పాటు చేశారు. ఐటీ పరిశ్రమలో ఇప్పుడు కీలక పరిస్థితులు నెలకొన్నాయని ఓ ఇంటర్వ్యూలో డెలాఫోర్ట్ అన్నారు.