కారు లోన్, కస్టమర్లకు జీపీఎస్ షాక్: ఆరుగురు ఉద్యోగుల్ని తొలగించిన హెచ్‌డీఎఫ్‌సీ

ప్రయివేటురంగ దిగ్గజం హెచ్‌డీఎఫ్‌సీ బ్యాంకు ఆరుగురు సీనియర్, మిడ్ లెవల్ ఎగ్జిక్యూటివ్స్‌ను తొలగించింది. వీరు బ్యాంకు ప్రవర్తనా నియమావళిని బేఖాతరు చేస్తూ కరప్షన్‌కు పాల్పడినట్లుగా అంతర్గత విచారణలో తేలడంతో వారిపై కఠిన చర్యలు తీసుకున్నట్లుగా వార్తలు వస్తున్నాయి. తొలగించబడిన ఉద్యోగులు ఆటో లోన్ డిపార్టుమెంట్‌కు చెందినవారు. వీరు ఉద్దేశ్యపూర్వకంగా కస్టమర్లు కారు కొనుగోలు చేసినప్పుడు వారితో జీపీఎస్ పరికరాలు కొనుగోలు చేసేలా చూశారు. ఇది బ్యాంకు నిబంధనలకు విరుద్ధం. మరో విషయం ఏమంటే లోన్ డాక్యుమెంట్స్ చెక్ చేసే వరకు జీపీఎస్ పరికరాలు తప్పనిసరి కాదనే విషయం కస్టమర్లకు తెలియకపోవడం గమనార్హం.

ఎందుకు అలా చేశారు

సదరు ఉద్యోగులు కస్టమర్లతో జీపీఎస్ పరికరాలు కొనుగోలు చేయించడానికి పలు కారణాలు ఉన్నాయని తెలుస్తోంది. ఆ ఉద్యోగులు తమ సేల్స్ టార్గెట్‌ను చేరుకునేందుకు, అలాగే డిఫాల్ట్ అయితే సులభంగా ట్రాక్ చేయడానికి ఉపయోగపడుతుందని.. ఇలా వివిధ కోణాల్లో వారు బ్యాంకు నియమావళికి విరుద్ధంగా బలవంతంగా ఉత్పత్తులను కట్టబెట్టారని తెలుస్తోంది. జీపీఎస్ ఉత్పత్తుల విక్రయం కోసం హెచ్‌డీఎప్‌సీ ఇందుకు సంబంధించిన సంస్థతో జత కట్టింది. అయితే అది కస్టమర్ల ఇష్టం. దీనిపై హెచ్‌డీఎఫ్‌సీ బ్యాంకు స్పందించాల్సి ఉంది.

2015-2019 వరకు..

కొందరు కస్టమర్లకు తాము వాహన ట్రాకింగ్ డివైజ్‌లు కొన్నామని కూడా బ్యాంకు ఉన్నతాధికారులకు తెలియదని విచారణలో వెల్లడైంది. రూ.18,000 నుండి రూ.19,500 విలువైన జీపీఎస్ డివైజ్‌లను 2015 నుండి డిసెంబర్ 2019 వరకు కారు లోన్ తీసుకున్న వారితో సదరు ఉద్యోగులు కొనుగోలు చేయించారు. దీంతో ఉన్నతాధికారులు దీనిని సీరియస్‌గా తీసుకున్నారు. ముంబైకి చెందిన ఓ ప్రయివేటు కంపెనీ వద్ద ఈ జీపీఎస్ పరికరాలు కొనుగోలు చేయించారని తెలుస్తోంది. ఇలా చేయడం కారు లోన్ తీసుకున్న వారిని మోసం చేసినట్లే అవుతుందని బ్యాంకు ఉన్నతాధికారులు భావించారు. అందుకే వారిని విధుల నుండి తొలగించారు.

అతిపెద్ద వెహికిల్ ఫైనాన్సింగ్ బ్యాంకు

అతిపెద్ద వెహికిల్ ఫైనాన్స్ హెచ్‌డీఎఫ్‌సీ నెలకు దాదాపు 50,000 నుండి 55,000 వరకు కారు లోన్స్ ఇస్తుంది. ఏడాదికి రూ.40,000 కోట్ల వ్యాపారం అవుతుంది. హెచ్‌డీఎఫ్‍‌సీతో పాటు ఇతర బ్యాంకులు కూడా జీపీఎస్ సహా వివిధ రకాల ప్రోడక్ట్స్‌ను కస్టమర్లు ఎంచుకునే వెసులుబాటును కల్పిస్తుంది. అయితే కారుతో పాటు ఈ కొనుగోళ్లు తక్కువగా ఉంటాయని చెబుతున్నారు.