రెండు రోజుల్లో భారీగా తగ్గిన బంగారం ధర, ఐదు రోజుల్లో పెరిగింది రూ.3,000

భారత మార్కెట్లో బంగారం ధరలు వరుసగా రెండో రోజు (బుధవారం 26 ఫిబ్రవరి) తగ్గాయి. ఎంసీఎక్స్‌లో ఏప్రిల్ గోల్డ్ ఫ్యూచర్స్ 10 గ్రాములకు 0.7 శాతం (రూ.300) తగ్గి రూ.42,485కు చేరుకుంది. అంతకుముందు సెషన్‌లో అంటే మంగళవారం 10 గ్రాముల బంగారం ధర రూ.765 తగ్గింది. మొత్తం రెండు రోజుల్లో రూ.1,065 వరకు తగ్గింది. వెండి ధర కూడా కిలో 1.2 శాతం తగ్గి రూ.47,020గా ఉంది. డాలరు మారకంతో రూపాయి బలపడటంతో సహా వివిధ కారణాలతో బంగారం ధర తగ్గింది.

అంతర్జాతీయ మార్కెట్లో ఎంత తగ్గిందంటే

అంతర్జాతీయ మార్కెట్లో బంగారం ధరలు ఔన్స్‌కు 0.5 శాతం తగ్గి రూ.1,643.49గా ఉంది. అంతకుముందు సెషన్‌లో 1.9 శాతం తగ్గిపోయింది. సోమవారం బంగారం ధర ఔన్స్‌కు 1,688.66కు చేరుకుంది. ఇది ఏడేళ్ల గరిష్టం. అయితే రెండు రోజులుగా ధరలు తగ్గుతున్నాయి. ఒక్క రోజులో రూ.1000 ఎగబాకిన ధర రెండు రోజుల్లో అంతే తగ్గింది. అయితే గత అయిదు రోజుల్లో పదిగ్రాముల బంగారం ఏకంగా రూ. 3000 పెరిగింది.

అయిదు రోజులుగా వరుసగా పెరుగుతున్న బంగారం ధర పెరుగుదలకు మంగళవారం బ్రేక్ పడినట్లయింది. అంతర్జాతీయ మార్కెట్లలో బంగారం ధరలు పడిపోవడంతో పాటు ఇన్వెస్టర్లు లాభాల స్వీకరణ వైపు మొగ్గు చూపడంతో బంగారం ధరలు ఎంసీఎక్స్‌లో మంగళవారం ఒక్కరోజే ఏకంగా రూ.1200 దిగి వచ్చింది.