Pakistan: పాక్ కు శాపంగా మారిన చైనా కుతంత్రం.. ప్రతి సారీ అదే మాట.. మెల్లగా మింగేస్తోంది..

డెట్ రీస్ట్రక్చరింగ్..

జూలై-సెప్టెంబర్ త్రైమాసికంలో పాకిస్తాన్ ఇప్పటికే 2.2 బిలియన్ డాలర్ల రుణాలను పొందింది. రానున్న డిసెంబర్ లో చెల్లించాల్సిన 3 బిలియన్ డాలర్లను రోలోవర్ చేయాలని సౌదీ అరేబియాను కోరింది. ఈ క్రమంలో పాక్ ప్రస్తుత ఆర్థిక సంవత్సరంలో ఎక్టర్నల్ లోన్స్ మెుత్తం 34 బిలియన్ డాలర్లు అవసరం. ఈ క్రమంలో రానున్న 8 నెలల్లో చెల్లించాల్సిన 6.3 బిలియన్ డాలర్ల రుణానికి గడువు పెంచాలని పాకిస్తాన్ చైనాను అభ్యర్థించింది.

చైనాతో చర్చలు..

పాక్ చెల్లించాల్సిన 6.3 బిలియన్ డాలర్ల రీఫైనాన్సింగ్ విషయంపై చైనా రాయబారి నోంగ్ రాంగ్, ఆర్థిక మంత్రి మహ్మద్ ఇషాక్ దార్ శనివారం చర్చించినట్లు తెలుస్తోంది. వీటికి అదనంగా ప్రస్తుత ఆర్థిక సంవత్సరంలో 900 మిలియన్ డాలర్లకు పైగా ద్వైపాక్షిక చైనీస్ అప్పులు చెల్లించాల్సి ఉంది. ఈ క్రమంలో పాక్ ప్రధాని షెహబాజ్ షరీఫ్ నవంబర్ 1న బీజింగ్‌ను సందర్శిస్తున్నారు. అయితే రుణ చెల్లింపులు, కొత్త ప్రాజెక్టుల ఫైనాన్సింగ్ వంటి కీలక అంశాలు ఈసారి ఎజెండాలో ప్రధానమైనవిగా తెలుస్తోంది.

నిండా ముంచిన CPEC..

ఎకనామిక్ కారిడార్ పేరుతో చైనా చాలా దేశాలను అప్పుల పాలు చేసింది. అలా ఆర్థికంగా చిన్నాభిన్నమైనదే మన పక్కన ఉన్న శ్రీలంక. సీపీఈసీ అనేది చైనా స్వార్ధపూరితమైన ఒక మెగా వ్యాపార విస్తరణ ప్రాజెక్ట్. అభివృద్ధిని ఎరగా వేసి చిన్న దేశాలను ఇందులో భాగస్వాములుగు చేసుకుంది చైనా. అయితే ఇప్పుడు వారికి ఇచ్చిన అప్పులు, వాటికి వడ్డీలు కలిపితే అవి పెద్ద అప్పుల ఊబిగా మారాయి. ప్రస్తుతం పాకిస్తాన్ సైతం ఇందులో చిక్కుకుని బయటకు రాలేక ప్రతిసారీ అప్పుల రీఫైనాన్సింగ్ కోసం చేయి చాచుతోంది.