రద్దు చేయలేదు కానీ.. రూ.5,000 కోట్ల చైనా ప్రాజెక్టులపై మహారాష్ట్ర కీలక నిర్ణయం
భారత్-చైనా సరిహద్దుల్లో ఉద్రిక్తతలుఈ రెండు దేశాల వాణిజ్య సంబంధాలపై ప్రభావం చూపుతోంది. ముఖ్యంగా భారతీయుల్లో ఎక్కువమంది చైనా వస్తువులకు దూరంగా ఉండాలని నిర్ణయించుకున్నారు. అంతేకాదు, వచ్చే ఏడాది నాటికి చైనా నుండి దిగుమతులు పెద్ద ఎత్తున తగ్గాలని కోరుకుంటున్నారు. ఈ నేపథ్యంలో మహారాష్ట్ర ప్రభుత్వం కీలక నిర్ణయం తీసుకుంది. రాష్ట్రంలో రూ.5,020 కోట్ల పెట్టుబడితో చైనా కంపెనీలు చేపట్టాల్సిన 3 ప్రాజెక్టుల్ని ఉద్దవ్ థాకరే నిలిపివేసినట్లు వార్తలు వచ్చాయి. అయితే వాటిని నిలిపివేయలేదు. ప్రస్తుతానికి హోల్డ్లో ఉంచారు. ఈ మేరకు ఆ రాష్ట్ర మంత్రి ప్రకటించారు.
చైనా ఉత్పత్తులకు రాంరాం, సర్వేలో 87% మంది చెప్పింది ఇదే
మూడు భారీ ఒప్పందాలు
ఈ అవగాహన ఒప్పందాల(MOU)పై పది రోజుల క్రితం సంతకాలు జరిగాయి. గాల్వాన్ లోయలో భారత్-చైనా బలగాల మధ్య జరిగిన ఘర్షణకు కొద్దిరోజుల ముందు మాగ్నటిక్ మహారాష్ట్ర 2.0 పేరుతో ఉద్ధవ్ ప్రభుత్వం నిర్వహించిన ఇన్వెస్టర్ల సమావేశంలో ఈ ఒప్పందాలు ఖరారయ్యాయి. చైనాకు చెందిన గ్రేట్ వాల్ మోటర్స్ రూ.3,770 కోట్లతో, పీఎంఐ ఎలక్ట్రోమొబిలిటీ రూ.1,000 కోట్లతో, హెంగ్లీ ఇంజినీరింగ్ రూ.250 కోట్లతో ఈ ఒప్పందాల్ని కుదుర్చుకున్నాయి. అయితే ఈ మూడు ప్రాజెక్టులను రద్దు చేస్తున్నట్లు వార్తలు వచ్చాయి.
ప్రాజెక్టులపై యథాతథ స్థితి
దీనిపై మహారాష్ట్ర పరిశ్రమల శాఖ మంత్రి సుబాష్ దేశాయ్ స్పందించారు. ఈ ఒప్పందాలను పూర్తిగా రద్దు చేయలేదని, వాటిని హోల్డ్లో పెట్టామన్నారు. ప్రస్తుతం ఈ మూడు ప్రాజెక్టులను రద్దు చేయకుండా పక్కన పెట్టామని, కేంద్ర ప్రభుత్వాన్ని సంప్రదించిన తర్వాతే ఈ నిర్ణయం తీసుకున్నామన్నారు. కానీ ఈ మూడు ఒప్పందాలను రద్దు చేసినట్లు కాదని, ఈ ప్రాజెక్టులపై యథాతథ స్థితి కొనసాగుతుందన్నారు. ఈ మూడు ప్రాజెక్టుల భవితవ్యంపై కేంద్ర ప్రభుత్వ విధాన నిర్ణయం కోసం ఎదురు చూస్తున్నట్లు తెలిపారు.
చైనా పెట్టుబడులపై...
చైనా కంపెనీలు - మహారాష్ట్ర మధ్య గ్రేట్ వాల్ మోటార్స్ (రూ.3,770 కోట్లు), పీఎంఐ ఎలక్ట్రో మొబిలిటీ సొల్యూషన్స్-ఫోటోన్(రూ.1,000 కోట్లు), హెంగ్లీ ఇంజినీరింగ్ (రూ.250 కోట్లు) ఒప్పందం కుదిరింది. ప్రస్తుతం ఈ పెట్టుబడులపై స్టేటస్ కో కొనసాగుతోంది. ఈ ప్రాజెక్టులకు సంబంధించి కేంద్రం నుంచి సమాచారం రావాల్సి ఉందని, అయితే చైనా నుండి మరిన్ని పెట్టుబడులకు దూరంగా ఉంటామనే అభిప్రాయం వ్యక్తం చేస్తోంది మహా ప్రభుత్వం.