సంక్రాంతి పండగ ప‌ర్వాన స్టాక్ మార్కెట్ సూచీలు సరికొత్త రికార్డు గ‌రిష్టాల వ‌ద్ద ముగిశాయి. ప్రధానంగా ఆర్థిక సేవ‌లు, మీడియా, నిఫ్టీ బ్యాంక్‌, ప్రవేట్‌ బ్యాంక్‌ షేర్ల‌లో ఇన్వెస్టర్ల భారీ పెట్టుబడులతో నేటి ట్రేడింగ్‌ ఆద్యంతం సూచీలు లాభాల ర్యాలీ చేశాయి. ఈ నేపథ్యంలోనే సూచీలు సోమవారం మరోసారి నూత‌న‌ జీవితకాల గరిష్టాలను నమోదు చేసాయి. బీఎస్‌ఈ సెన్సెక్స్‌ 251 పాయింట్ల లాభంతో 34,843 పాయింట్ల వద్ద, ఎన్‌ఎస్‌ఈ నిఫ్టీ 60.30పాయింట్ల లాభంతో 10,741 పాయింట్ల వద్ద ముగిశాయి. సెన్సెక్స్‌ 34,687.21- 34,963.69 పాయింట్ల రేంజ్‌లో కదలాడింది. నిఫ్టీ సూచీ 10,713.80-10,782.65 శ్రేణిలో కదలాడింది. కీలకమైన బ్యాంక్‌ నిఫ్టీ పాయింట్ల 26,091.80 వ‌ద్ద కొత్త రికార్డును నెల‌కొల్పి 20,069 పాయింట్ల వద్ద ముగిసింది.

నిఫ్టీ దిగ్గజాలలో హెచ్‌డీఎఫ్‌సీ దాదాపు 6 శాతం దూసుకెళ్లగా, ఐసీఐసీఐ, అంబుజా, జీ, అల్ట్రాటెక్‌, హెచ్‌డీఎఫ్‌సీ బ్యాంక్‌, కొటక్‌ బ్యాంక్‌, టాటా స్టీల్‌, పవర్‌గ్రిడ్‌, యాక్సిస్‌ 4-1 శాతం మధ్య ఎగశాయి. అయితే ఐషర్‌, గెయిల్‌, ఓఎన్‌జీసీ, బజాజ్‌ ఫైనాన్స్‌, హీరోమోటో, హెచ్‌సీఎల్‌ టెక్‌, సన్‌ ఫార్మా, టీసీఎస్‌, యస్‌బ్యాంక్‌, ఎంఅండ్‌ఎం 2.5-1.2 శాతం తిరోగమించాయి. బీఎస్‌ఈలో 1,525 షేర్లు లాభపడితే 1412 డీలాపడ్డాయ్‌.