గుడ్‌న్యూస్, వాట్సాప్‌లో EPFO సేవలు: ఆంధ్రప్రదేశ్, తెలంగాణ రాష్ట్రాల నెంబర్లు ఇవే...

ఉద్యోగుల భవిష్య నిధి సంస్థ (EPFO) సబ్‌స్క్రైబర్ల సమస్యలను వేగంగా పరిష్కరించేందుకు వీలుగా వాట్సాప్ సేవలను ప్రారంభించింది. ఈ మేరకు కార్మిక మంత్రిత్వశాఖ వెల్లడించింది. వాట్సాప్ హెల్ప్ లైన్ ఈపీఎఫ్ఓకు చెందిన 138 ప్రాంతీయ కార్యాలయాల్లో అందుబాటులో ఉంటుంది. EPFOకు చెందిన అధికారిక వెబ్ సైట్‌లో ప్రాంతీయ కార్యాలయాల వాట్సాప్ నెంబర్లు అందుబాటులో ఉన్నాయి. సబ్‌స్క్రైబర్ ఎక్కడ అయితే తన పీఎఫ్ ఖాతాను కొనసాగిస్తున్నారో ఆ వాట్సాప్ నెంబర్‌కు సమస్యలు తెలియజేయవచ్చు.

కరోనా సమయంలో ఆటంకాలు లేకుండా..

ఇప్పటికే ఈపీఎఫ్ఓ సమస్యల కోసం EPFiGMS పోర్టల్, CPGRAMS, సోషల్ మీడియా ప్లాట్‌ఫామ్స్(ఫేస్‌బుక్, ట్విట్టర్), 24x7 కాల్ సెంటర్‌కు ఈ వాట్సాప్ సేవలు అదనం. ఈ వాట్సాప్ నెంబర్ ద్వారా సబ్‌స్క్రైబర్లు ఫిర్యాదులను దాఖలు చేయవచ్చు లేదా ప్రశ్నించి ఏదైనా మార్గదర్శనం పొందవచ్చు. 'ఈపీఎఫ్ఓ సభ్యులకు మరింత సౌకర్యార్థం ఈపీఎఫ్ఓ తాజాగా వాట్సాప్ ఆధారిత హెల్ప్‌లైన్, ఫిర్యాదుల పరిష్కార విభాగాన్ని ఏర్పాటు చేసింది. కరోనా సమయంలో సభ్యులకు ఎలాంటి ఆటంకాలులేని సేవలు అందించడమే దీని లక్ష్యమ'ని కార్మిక శాఖ తన ప్రకటనలో తెలిపింది.

ప్రాంతీయ కార్యాలయం హెల్ప్ నెంబర్ పైన..

అక్టోబర్ 13న ఈపీఎఫ్ఓ వాట్సాప్ ద్వారా 1.64 లక్షల ఫిర్యాదులను పరిష్కరించింది. వాట్సాప్ సేవలు లాంచ్ చేసిన అనంతరం సోషల్ మీడియా ద్వారా 30 శాతం, EPFiGMS పోర్టల్ ద్వారా 16 శాతం తగ్గాయి.

పీఎఫ్ ఖాతాదారు సంబంధిత ప్రాంతీయ కార్యాలయం హెల్ప్ నెంబర్ పైన వాట్సాప్ సందేశాన్ని పంపించడం ద్వారా ఈపీఎఫ్ఓ సేవలు పొందవచ్చు.

తెలుగు రాష్ట్రాల హెల్ప్ నెంబర్లు

తెలుగు రాష్ట్రాల ప్రాంతీయ కార్యాలయాల హెల్ప్ నెంబర్లు ఇక్కడ ఉన్నాయి.

విజయవాడ జోనల్ ఆఫీస్ పరిధిలోని గుంటూరు - 0863-2344123, కడప - 9491138297, రాజమండ్రి - 9494633563, విశాఖపట్నం - 7382396602.

హైదరాబాద్ రీజినల్ పరిధిలోని బర్కత్‌పుర (హైదరాబాద్) - 9100026170, మాదాపూర్ (హైదరాబాద్) - 9100026146, కరీంనగర్ - 9492429685, కూకట్‌పల్లి - 9392369549, నిజామాబాద్ - 8919090653, పటాన్‌చెరు - 9494182174, సిద్దిపేట - 9603262989, వరంగల్ - 8702447772.