ఏ ఆదాయపు పన్ను విధానం కావాలి: ఈ అవకాశం ఉద్యోగులకే..

2020-21 ఆర్థిక సంవత్సరానికి గాను రెండు ఆదాయపు పన్ను విధానాలు అమలులోకి వచ్చిన విషయం తెలిసిందే. కొత్త పన్ను విధానం కావాలా వద్దా అనే విషయాన్ని ఉద్యోగులు తమ సంస్థలు లేదా కంపెనీల యాజమాన్యానికి వెల్లడించాలి. ఈ మేరకు ఆదాయపు పన్ను విభాగం సర్క్యులర్ జారీ చేసింది. తద్వారా వేతనాల నుండి టీడీఎస్ మినహాయింపుకు వీలు కల్పించాలని కోరుతోంది. కొత్త పన్ను విధానంలో నిర్దిష్ట పన్ను మినహాయింపులు పొందకుంటే తక్కువ పన్ను రేట్లు వర్తిస్తాయి.

ఉద్యోగులు కంపెనీలకు తెలియజేయాలి

పాత, కొత్త పన్ను విధానాలలో దేనిని ఎంచుకుంటామనే విషయాన్ని ఉద్యోగులు తమ కంపెనీలకు తెలియజేయాల్సి ఉంటుందని ప్రత్యక్, పన్నుల కేంద్ర బోర్డు (CBDT) ఒక సర్క్యూలర్‌లో తెలిపింది.

పాత పన్ను విధానం

పాత పన్ను విధానంలో రూ.2.5 లక్షల వరకు ఎలాంటి ఆదాయపు పన్ను లేదు. రూ.2.5 లక్షల నుండి రూ.5 లక్షల వరకు 5 శాతం, రూ.5 నుండి రూ.10 లక్షల వరకు 20 శాతం, రూ.10 లక్షల నుండి ఆ పైన 30 శాతం పన్ను విధిస్తారు.

కొత్త పన్ను విధానం

కొత్త పన్ను విధానమైతే రూ.2.5 లక్షల నుండి 5 లక్షల వరకు 5 శాతం, రూ.5 లక్షల నుండి రూ.7 లక్షల వరకు 10 శాతం, రూ.7.5 లక్షల నుండి రూ.10 లక్షల వరకు 15 శాతం వర్తిస్తుంది. రూ.10 లక్షల నుండి రూ.12.5 లక్షల వరకు 20 శాతం, రూ.12.5 లక్షల నుండి రూ.15 లక్షల వరకు 25 శాతం, రూ.15 లక్షల కంటే పైన 30 శాతం వర్తిస్తుంది. అయితే ఇందులో కొన్ని పన్ను మినహాయింపులు వదులుకోవాలి. ఇది ఆప్షన్ మాత్రమే.