కంపెనీ డైరెక్టర్ల వేతనాలపై వస్తు, సేవల పన్ను చెల్లించక్కర్లేదు, అలా చేస్తే మాత్రం పన్ను

కంపెనీ డైరెక్టర్లు అదే సంస్థలో పని చేసే ఉద్యోగులు అయితే అలాంటి వారికి చెల్లించే వేతనాలపై జీఎస్టీ చెల్లించాల్సిన అవసరం లేదని కేంద్ర పరోక్ష పన్నులు, సుంకాల మండలి (CBIC) బుధవారం వెల్లడించింది. కంపెనీలు తమ డైరెక్టర్లకు వేతనంపై జీఎస్టీ చెల్లించాలని గత ఏప్రిల్ నెలలో రాజస్థాన్ అథారిటీ ఆఫ్ అడ్వాన్స్ రూలింగ్ (AAR) రూలింగ్ ఇచ్చింది. దీనిపై తాజాగా CBIC వివరణ ఇచ్చింది.

ఆ వేతనాలపై జీఎస్టీ చెల్లించాల్సిన అవసరం లేదు

డైరెక్టర్లు చెల్లించే వేతనాలను కంపెనీ పుస్తకాల్లో వేతనాల కింద చూపిస్తూ, ఐటీ చట్టంలోని సెక్షన్ 192 ప్రకారం మూలం వద్ద పన్ను కోత (TDS) విధిస్తుంటే కనుక సీజీఎస్టీ చట్టం 2017లోని సెక్షన్-3 ప్రకారం ఆ వేతనాలపై ఎలాంటి జీఎస్టీ చెల్లించవలసిన అవసరం లేదని CBIC పేర్కొంది. అయితే ఒకవేళ వారికి ప్రొఫెషనల్ ఫీజు రూపంలో చెల్లిస్తే ఆ మొత్తంపై రివర్స్ ఛార్జీ విధానంలో జీఎస్టీ చెల్లించాలని పేర్కొంది.

ఇలా అయితే జీఎస్టీ ఉంటుంది

కంపెనీలలో ఉద్యోగులుగా లేని స్వతంత్ర డైరెక్టర్లు పారితోషికం తీసుకుంటూ సదరు కంపెనీలకు అందించే సేవలపై కూడా జీఎస్టీ విధిస్తారని CBIC తెలిపింది. అంటే వేతనం కాకుండా వృత్తి ఫీజు రూపంలో ఉంటే రివర్స్ ఛార్జ్ విధానంలో జీఎస్టీ ఉంటుంది.

18 శాతం ఆదా

కంపెనీ డైరెక్టర్ల రెమ్యునరేషన్ పైన CBIC ఇచ్చిన స్పష్టత నేపథ్యంలో ఎగ్జిక్యూటివ్ డైరెక్టర్లకు చెల్లించే వేతనంపై 18 శాతం పన్ను ఆదా అవుతుందని ఏఎంఆర్జీ అండ్ అసోసియేట్స్ సీనియర్ పార్ట్‌నర్ రజత్ మోహన్ చెప్పారు. వ్యాపార సంస్థలు ఇప్పుడు ఆదాయపు పన్ను, జీఎస్టీ, అకౌంటింగ్ కింద డైరెక్టర్ల వేతనాన్ని సమగ్రంగా అంచనా వేసుకోవచ్చునని నిపుణులు చెబుతున్నారు.