భారత్ ఎగుమతులు 67 శాతం జంప్, వాణిజ్య లోటు 8 నెలల కనిష్టానికి...

మే నెలలో భారత్ నుండి ఎగుమతులు ఏడాది ప్రాతిపదికన 67 శాతం పెరిగి 32.21 బిలియన్ డాలర్లకు చేరుకున్నాయి. ప్రస్తుతం వాణిజ్యలోటు ఎనిమిది నెలల కనిష్టానికి చేరుకుంది. ఇంజినీరింగ్, పెట్రోలియం, జెమ్స్ అండ్ జ్యూవెల్లరీ అత్యధికంగా ఎగుమతి అయినట్లు కేంద్ర ప్రభుత్వం విడుదల చేసిన నివేదిక వెల్లడిస్తోంది. అంతకుముందు ఏడాది ఇదే నెలలో 19.24 బిలియన్ డాలర్ల ఎగుమతులు నమోదయ్యాయి. ఇదే నెలలో 38.53 బిలియన్ డాలర్ల విలువైన ఉత్పత్తులను భారత్ దిగుమతి చేసుకుంది. దీంతో వాణిజ్య లోటు 6.32 బిలియన్ డాలర్లుగా నమోదయింది.

గత నెలలో 9.45 బిలియన్ డాలర్ల విలువైన చమురు దిగుమతి అయింది. మే 2020 నెలలో అయిన 3.57 బిలియన్‌ డాలర్లతో పోలిస్తే మూడు రెట్లు పెరిగింది. ఏప్రిల్-మే రెండు నెలల్లో ఎగుమతులు 62.84 బిలియన్ డాలర్లకు చేరుకున్నాయి. ఇదే సమయంలో 84.25 బిలియన్ డాలర్లు దిగుమతులు నమోదయ్యాయి.

ప్రస్తుత ఆర్థిక సంవత్సరంలో వజ్రాల ఎగుమతులు 20 శాతం మేర వృద్ధి చెంది 2,000 కోట్ల డాలర్ల స్థాయిని దాటవచ్చునని క్రిసిల్ నివేదిక అంచనా వేసింది. అగ్రరాజ్యాలు కరోనా సంక్షోభం నుండి క్రమంగా కోలుకుంటుండటం ఇందుకు దోహదపడనుందని నివేదికలో పేర్కొంది.