ఎగుమతులు 58.28 శాతం పెరిగి 34 బిలియన్ డాలర్లకు...

దేశీయ ఎగుమతులు మార్చి నెలలో 58.23 శాతం ఎగిసి 34 బిలియన్ డాలర్లకు చేరుకున్నాయి. కామర్స్ మినిస్ట్రీ ప్రొవిజనల్ డేటా ప్రకారం ఇంజినీరింగ్, జెమ్స్, జ్యువెల్లరీ, ఫార్మాస్యూటికల్స్ ఎగుమతులు రికార్డ్ స్థాయికి చేరుకోవడం వంటి వివిధ అంశాల నేపథ్యంలో ఎగుమతులు జంప్ చేశాయి. 2020-21 ఆర్థిక సంవత్సరం ఏప్రిల్-మార్చి కాలంలో ఎగుమతులు 7.4 శాతం క్షీణించి 290.18 బిలియన్ డాలర్లుగా నమోదయింది. 2019-20 ఆర్థిక సంవత్సరంలో ఇదే కాలంలో 313.36బిలియన్ డాలర్లుగా నమోదయింది.

2020-21 ఆర్థిక సంవత్సరంలో దిగుమతులు 18 శాతం క్షీణించి 388.92 బిలియన్ డాలర్లు నమోదు కాగా, అంతకుముందు సంవత్సరం ఇదే కాలంలో 474.71 బిలియన్ డాలర్లుగా నమోదయ్యాయి. మార్చి 2020 నెలలో ఎగుమతులు 21.49 డాలర్లు నమోదయ్యాయి. మార్చి 2019తో పోలిస్తే 34 శాతం క్షీణించింది.

ఇండియా మర్చంటైజ్డ్ ఎగుమతులు మార్చి 2020లో 21.49 బిలియన్ డాలర్లు కాగా, ఈ ఏడాది మార్చిలో 34.0 బిలియన్ డాలర్లుగా నమోదయ్యాయి. అంటే 58.23 శాతం వృద్ధిని నమోదు చేసింది. నెల ప్రాతిపదికన ఇంత వృద్ధి నమోదు కావడం ఇది మొదటిసారి. ఎగుమతులు 34 బిలియన్ డాలర్ల మార్కును దాటాయి. దిగుమతులు కూడా 52.89 శాతం ఎగిసి 48.12 బిలియన్ డాలర్లుగా నమోదయ్యాయి. గత ఏడాది ఇదే కాలంలో 31.47 బిలియన్ డాలర్లుగా ఉన్నాయి.