న్యూఢిల్లీ: ఆదాయ పన్ను వసూళ్లు గత నాలుగేళ్లలో భారీగా పెరిగాయని కేంద్రమంత్రి పీయూష్ గోయల్ చెప్పారు. ఆయన శుక్రవారం మధ్యంతర బడ్జెట్ ప్రవేశపెట్టిన విషయం తెలిసిందే. పేద, మధ్యతరగతి, రైతులకు భారీ ఊరట కలిగించింది ఈ బడ్జెట్. ఈ విషయం పక్కన పెడితే ఆన్‌లైన్, ఇతర సాంకేతికతల వల్ల పన్ను వసూళ్లు భారీగా పెరిగాయి.

2013-14లో రూ.6.38 లక్షల కోట్లుగా ఉన్న పన్ను వసూళ్లు ఈ ఏడాది రూ.12 లక్షల కోట్లకు పెరిగాయి. పన్ను రిటర్నులు దాఖలు చేసే వారి సంఖ్య 80 శాతం పెరిగినట్లుగా తెలిపారు. వీరి సంఖ్య 3.79 కోట్ల నుంచి 6.85 కోట్లకు చేరింది.

పార్లమెంటులో ఆర్థిక మంత్రి పీయూష్ గోయల్‌ బడ్జెట్‌పై ప్రసంగిస్తూ తమ ప్రభుత్వంపై నమ్మకంతో నిజాయతీగా పన్నులు చెల్లిస్తున్న వారికి కృతజ్ఞతలు తెలిపారు. ప్రజలు చెల్లించే పన్ను ఆదాయాన్ని పేదల అభ్యున్నతికి, మెరుగైన మౌలిక సదుపాయాల నిర్మాణాలకు ఉపయోగిస్తామని స్పష్టం చేశారు.