మెచ్యూరిటీకి ముందే పీఎఫ్ ఉపసంహరించుకుంటే ట్యాక్స్ పడుతుందని తెలుసా?

ఎంప్లాయీస్ ప్రావిడెండ్ ఫండ్ (EPF) ట్యాక్స్ ఫ్రీ పెట్టుబడి ఆప్షన్. రూ.1.5 లక్షల వరకు చేసే పెట్టుబడిపై ఆదాయపు పన్ను మినహాయింపు ఉంటుంది. అలాగే, పీఎఫ్ కాంట్రిబ్యూషన్‌పై వచ్చే వడ్డీపై ట్యాక్స్ మినహాయింపు ఉంటుంది. మెచ్యూరిటీ పూర్తయ్యాక విత్ డ్రా చేస్తే పన్ను ఉండదు. ఉద్యోగులు ఎవరైనా రెగ్యులర్ పేయింగ్ జాబ్ నుంచి రిటైర్ అయ్యాకే పీఎఫ్ బ్యాలెన్స్ అమౌంట్‌ను తీసుకునేందుకు అర్హులు. ప్రత్యేక సందర్భాలలో మాత్రమే పీఎఫ్ అమౌంట్ తీసుకోవచ్చు.

మెచ్యూరిటీ కంటే పీఎఫ్ అమౌంట్ తీసుకోవడానికి కొన్ని రూల్స్ ఉన్నాయి. ఉపాధి లేకపోవడం, పెళ్లి, చదువు, అనారోగ్యం, లోన్ రీపేమెంట్, భూమి కొనుగోలు, ఇంటి నిర్మాణం లేదా కొనుగోలు వంటి వాటి కోసం పీఎఫ్ డబ్బుల్ని ముందుగా తీసుకోవచ్చు. మెచ్యూరిటీకి అయిదేళ్ల ముందు పీఎఫ్ అకౌంట్‌ను విత్ డ్రా చేసుకుంటే ఆదాయపు పన్ను చెల్లించవలసి ఉంటుంది. ట్యాక్స్ స్లాబ్ ప్రాతిపదికన విత్ డ్రా చేసిన సొమ్ముపై పన్ను ఉంటుంది.

ఆన్ లైన్ ద్వారా పీఎఫ్ డబ్బుల కోసం దరఖాస్తు చేసుకోవచ్చు. ప్రావిడెంట్ ఫండ్ బ్యాలెన్స్ కోసం దరఖాస్తు చేసుకున్నవారు ఈపీఎఫ్ఓ ఆన్ లైన్ పోర్టల్, www.epfindia.gov.inకు వెళ్లి క్లెయిమ్ స్టేటస్ తెలుసుకోవచ్చు. ఎంప్లాయర్.. పీఎఫ్ ఉపసంహరణ అభ్యర్థనను ఈపీఎఫ్ఓ ఆన్ లైన్ పోర్టల్ ద్వారా ఆమోదించాలి. కాగా, 2018-19 సంవత్సరానికి గాను ఎంప్లాయీస్ ప్రావిడెంట్ ఫండ్ పైన వడ్డీ రేటు 8.65 శాతంగా ఉంది.