YES Bank crisis: యస్ బ్యాంకు వ్యాపారం మారుతోంది: కార్పోరేట్ రుణాలకు చెక్

యస్ బ్యాంకులో సమూల మార్పులు తీసుకురావాలని అడ్మినిస్ట్రేటర్ ప్రశాంత్ కుమార్ వెల్లడించారు. ఇందులో భాగంగా కార్పోరేట్ రుణాలను విక్రయించే అవకాశం ఉందని చెప్పారు. బ్యాంకును కార్పోరేట్ రుణ వ్యాపారం నుండి రిటైల్ లోన్ వ్యాపారం వైపు మళ్లిస్తామన్నారు. ఆర్బీఐ హామీ ఇచ్చాక యస్ బ్యాంకు ఏటీఎంల వద్ద క్యూ తగ్గిందని చెప్పారు.

సౌదీ అరేబియా-రష్యా క్రూడాయిల్ యుద్ధం

యస్ బ్యాంకుపై ప్రజలకు ఊరట కల్పించింది ఇవే

యస్ బ్యాంకుపై ప్రజలకు నమ్మకం తగ్గలేదని చెప్పారు ప్రశాంత్ కుమార్. ఎస్బీఐ 49 శాతం పెట్టుబడులు పెట్టడమే మొదట నమ్మకాన్ని పెంచిందని చెప్పారు. అదే సమయంలో బ్యాంకు రిసొల్యూషన్ ప్రక్రియ వేగవంతమైందన్నారు. ఆ తర్వాత ఆర్బీఐ మద్దతు, ఎస్బీఐ అండ వల్ల ప్రజలకు ఊరట కల్పించిందన్నారు. బ్యాంకు మూలధన సేకరణ ప్రణాళికలు సిద్ధం కావడం కూడా ప్రజల్లో విశ్వాసం నింపిందన్నారు.

మార్చి 14న క్వార్టర్ ఫలితాలు

మార్చి 14వ తేదీన బ్యాంకు క్వార్టర్ ఫలితాలు వెల్లడిస్తామని ప్రశాంత్ చెప్పారు. డిపాజిట్లను విత్ డ్రా చేసుకునే కస్టమర్ల అవసరాలు తీర్చడం ప్రస్తుతం తమ ముందు ఉన్న కర్తవ్యమన్నారు.

రిటైల్ ఇన్వెస్టర్లు బలయ్యారా?

మరోవైపు, యస్ బ్యాంకు నుండి పెద్దలు ముందే తప్పుకుని, రిటైల్ ఇన్వెస్టర్లను బలి చేశారనే వాదనలు వినిపిస్తున్నాయి. వాల్యూ హంటింగ్ పేరుతో షేర్లను రిటైల్ ఇన్వెస్టర్లకు పెద్ద ఎత్తున విక్రయించారని తెలుస్తోంది. ఎస్బీఐ జోక్యంతో డిపాజిటర్లకు ఊరట దక్కింది. కానీ ఈ బ్యాంకు షేర్‌లో ఇన్వెస్ట్ చేసిన రిటైల్ ఇన్వెస్టర్ మాత్రం కోలుకునే పరిస్థితి లేదనే వాదనలు వినిపిస్తున్నాయి.

త్వరలో బోర్డు..

బ్యాంకుకు పూర్తిస్థాయి బోర్డును ఏర్పాటు చేసేందుకు ఆర్బీఐ కసరత్తు చేస్తోంది. బోర్డు ఏర్పడగానే రిటైల్ బ్యాంకుగా మార్చే అంశం బోర్డు ముందుకు రానుంది. ఇప్పటికే ఉన్న కార్పోరేట్ రుణాల విభాగం ఇక నుండి కేవలం గతంలో ఇచ్చిన రుణాల వసూలుకు మాత్రమే పరిమితమవుతుంది. కొత్త రుణాలు ఉండవు. భవిష్యత్తులో బ్యాంకు ఆశ్తుల్లో డెబ్బై శాతం వరకు రిటైల్ రుణాలు ఉంటాయి. ప్రస్తుతం ఇవి 35 శాతం వరకు మాత్రమే ఉన్నాయి.