షాకింగ్: వొడాఫోన్ ఐడియా గట్టెక్కాలంటే 70% టారిఫ్ పెంచాల్సిందే!

వొడాఫోన్ ఐడియా కార్యకలాపాలు స్థిరంగా ఉండాలంటే టారిఫ్స్ 70 శాతం వరకు పెంచాల్సిన అవసరం ఉందని యాక్సిస్ క్యాపిటల్ అంచనా వేసింది. ప్రస్తుతం వినియోగదారుడిపై వచ్చే ఆర్పు (ARPU) రూ.107గా ఉందని, ఇది కనీసం రూ.180కి చేరుకుంటే కానీ బ్యాలెన్స్ షీట్ పైన ఒత్తిడి తగ్గదని పేర్కొంది. ఇందుకు ఛార్జీలను భారీగా పెంచక తప్పదని అభిప్రాయపడింది.

వొడాఫోన్ ఐడియాలో ఈ టారిఫ్ పెంపు ఏడాది నుంచి రెండేళ్ల కాలంలో జరగవచ్చునని అంచనా వేసింది. ప్రతి కస్టమర్ పైన ఆర్పు పెరిగితే నిర్వహణ లాభం ఏడాదికి రూ.21,300 కోట్లకు చేరుకోవచ్చునని పేర్కొంది. డిసెంబర్ నెల నుంచి తేదీ నుంచి టారిఫ్స్ పెంచుతామని ఇప్పటికే వొడాఫోన్ ఐడియా ప్రకటించింది. అయితే ఎంత పెంచుతుందనే అంశంలో స్పష్టత రావాల్సి ఉంది.

కస్టమర్ పైన సగటు ఆదాయం 10% పెరిగితే టెల్కోలకు రానున్న మూడేళ్లలో రూ.33,000 కోట్ల అదనపు ప్రయోజనం చేకూరుతుందని టెలికం విభాగం అంచనా వేస్తోంది. టారిఫ్స్ 70 శాతం పెంచితే పరిశ్రమకు రాబోయే మూడేళ్లలో రూ.2 లక్షల కోట్ల అదనపు ప్రయోజనం ఉంటుందని యాక్సిస్ క్యాపిటల్ పేర్కొంది.