గతేడాది కొత్త ఉద్యోగాలు 1.70 లక్షలే! లక్ష ఉద్యోగులు.. టాప్ 9లో నాలుగు ఐటీ కంపెనీలే

గత ఏడాది మందగమనం కారణంగా ఆర్థిక వ్యవస్థలో ఒత్తిడి కనిపించింది. దీంతో ఉద్యోగ కల్పనా వృద్ధిరేటు 2018-19 ఆర్థిక సంవత్సరం 3.8 శాతంతో పోలిస్తే, 2019-20 ఆర్థిక సంవత్సరంలో 3.5 శాతానికి పరిమితమైందని కేర్ రేటింగ్స్ నివేదిక తెలిపింది. అయితే ఉద్యోగాల మొత్తం సంఖ్య 48.32 లక్షల నుండి 50.02 లక్షలకు పెరిగినట్లు వెల్లడించింది. అంటే 2019-20 ఆర్థిక సంవత్సరంలో ఎక్కువగా వచ్చిన కొత్త ఉద్యోగాలు 1.70 లక్షలు మాత్రమే.

ఉద్యోగాల కోత

2018-19 ఆర్థిక సంవత్సరంలో 272 కంపెనీలు 1.18 లక్షల ఉద్యోగాల కోత విధిస్తే, 2019-20 ఆర్థిక సంవత్సరంలో మాత్రం 321 కంపెనీలు 1.13 లక్షల ఉద్యోగ కోత విధించాయి. అంతకుముందు ఏడాది కొత్తగా 1.76 లక్షల కోత్త ఉద్యోగాల కల్పనతో పోలిస్తే, గత ఏడాది 1.70 లక్షల ఉద్యోగాల సృష్టి జరిగిందని, అంటే అంతకుముందు ఏడాదితో పోలిస్తే తక్కువ జరిగిందని కేర్ రేటింగ్స్ పేర్కొంది. గత ఏడాది మందగమనం కారణంగా భారత ఆర్థిక వ్యవస్థ ఇబ్బందులు ఎదుర్కొంది. ఇప్పుడు కరోనా కారణంగా అంతకంటే ఎక్కువ ప్రభావంపడింది.

9 కంపెనీల్లో లక్షకు పైగా ఉద్యోగులు

- 2019-20 ఆర్థిక సంవత్సరంలో టాప్ 10 కంపెనీలు1.41 లక్షల మంది ఉద్యోగులను చేర్చుకున్నాయి. ఇందులో నాలుగు ఐటీ కంపెనీలు, నాలుగు బ్యాంకులు ఉండగా, రెండు ఎన్‌బీఎఫ్‌సీలు ఉన్నాయి.

- తొమ్మిది కంపెనీల్లో.. ఒక్కో కంపెనీలో లక్షకు పైగా ఉద్యోగులు ఉన్నారు.

- ఇందులో నాలుగు ఐటీ కంపెనీలే ఉండటం గమనార్హం. రెండు బ్యాంకింగ్ సెక్టార్‌లో ఉన్నాయి. మిగతా మూడింటిలో ఒకటి ఆటో, ఒకటి ఎన్‌బీఎఫ్‌సీ రంగాల్లో ఉండగా, మరొకటి ఇతర రంగాల్లో ఉంది.

- 7 కంపెనీల్లో ఉద్యోగుల సంఖ్య 50,000 నుండి 1 లక్ష వరకు ఉన్నాయి.

- 17 కంపెనీల్లో ఉద్యోగులు 25,000 నుండి 50,000 మధ్య ఉన్నారు.

- మొత్తంగా 33 కంపెనీల్లో హెడ్ కౌంట్ 25,000 మందికి పైగా ఉద్యోగులు ఉన్నారు. మొత్తం ఎంప్లాయిమెంట్‌లో ఇది 57 శాతం.

ఈ రంగాల్లో వృద్ధి బాగుంది

- రంగాలవారీగా చూస్తే ఐటీ (23 శాతం), బ్యాంకింగ్(22 శాతం), ఆటో(9 శాతం), ఫైనాన్స్(7 శాతం) ఉండగా, ఈ నాలుగు రంగాల వాటానే 61 శాతంగా ఉంది.

- ఒకప్పుడు ఎక్కువ మంది ఉద్యోగులతో టాప్ 1గా నిలిచిన టెక్స్‌టైల్స్ రంగం ఇప్పుడు 5వ స్థానంలో ఉంది. దీని వాటా 2.4 శాతంగా ఉంది.

- పది రంగాల్లో హెడ్ కౌంట్ క్షీణిస్తోంది.

- 33 రంగాల్లో 11 విభాగాల్లో ఉద్యోగాల వృద్ధి సగటు 3.5 శాతం కంటే ఎక్కువగా ఉంది.

- ఎలక్ట్రికల్స్, ఆర్థికం, బ్యాంకింగ్, ఐటీ, ఎఫ్ఎంసీజీ, మన్నికైన వినియోగ వస్తువుల, ట్రేడింగ్, కెమికల్స్, ఇనుము, ఉక్కు, రిటైల్, ఇన్సురెన్స్ రంగాల్లో ఉద్యోగాల కల్పన ఎక్కువగా ఉంది.