బంగారం దిగుమతిపై ఫలితం అందిస్తోన్న కేంద్రం చర్యలు.. ఎలాగంటే

బంగారం దిగుమతుల్ని తగ్గించేందుకు కేంద్ర ప్రభుత్వం తీసుకుంటున్న చర్యలు మంచి ఫలితాలు ఇస్తున్నాయి. 2019-20 ఆర్థిక సంవత్సరం ఏప్రిల్ నుంచి జనవరి మధ్యకాలంలో బంగారం దిగుమతులు ఏడాది ప్రాతిపదికన తొమ్మిది శాతం తగ్గి 24.64 బిలియన్ డాలర్లకు మాత్రమే పరిమితం అయ్యాయి. దేశీయ కరెన్సీలో ఇది రూ.1.74 లక్షల కోట్లుగా ఉందని కేంద్ర వాణిజ్య మంత్రిత్వ శాఖ ఓ ప్రకటనలో తెలిపింది.

తగ్గుముఖం పట్టిన దిగుమతులు

అంతకుముందు ఏడాది (2018-19) ఇదే సమయంలో దిగుమతులు 27 బిలియన్ డాలర్లుగా ఉంది. బంగారం దిగుమతులు తగ్గుముఖం పట్టడంతో వాణిజ్యలోటు 133.27 బిలియన్ డాలర్లకు పరిమితమైంది. అంతకుముందు ఏడాది ఇదే వాణిజ్యలోటు 163.27 బిలియన్ డాలర్లుగా నమోదైంది. గత ఏడాది జూలై నుంచి బంగారం దిగుమతులు తగ్గుతున్నాయి. అక్టోబర్, నవంబర్ నెలల్లో మాత్రం అంతకుముందు ఏడాది కంటే ఎక్కువ వృద్ధిని నమోదు చేశాయి.

ద్రవ్యలోటు కట్టడి కోసం..

పసిడి డిసెంబర్ నెలలో 4 శాతం, జనవరిలో 31.5 శాతం మేర ప్రతికూల వృద్ధిని నమోదు చేసింది. ఇండియాలో ఆభరణాలకు ఎక్కువగా డిమాండ్ ఉంటుంది. భారత్ ప్రతి ఏటా 800 టన్నుల నుండి 900 టన్నుల పసిడిని దిగుమతి చేసుకుంటోంది. ద్రవ్యలోటును కట్టడి చేసేందుకు దిగుమతులపై విధించే పన్నును గత ఏడాది 10% శాతం నుంచి 12.5% పెంచింది.

వర్తకుల డిమాండ్

బంగారం వర్తకులు ఈ పన్నును 4% తగ్గించాలని డిమాండ్ చేస్తున్నారు. గత పది నెలల్లో జెమ్స్ అండ్ జ్యూవెల్లరీ ఎగుమతులు కూడా 1.45% తగ్గి 25.11 బిలియన్ డాలర్లుగా నమోదయింది. 2018-19లో భారత్ 32.8 బిలియన్ డాలర్ల విలువైన పసిడిని దిగుమతి చేసుకుంది. అంతకుముందు ఏడాదితో పోలిస్తే 3% తక్కువ.