ఏప్రిల్-జూన్ త్రైమాసికంలో బంగారం డిమాండ్ ఎలా ఉందంటే?

ఏప్రిల్-జూన్ త్రైమాసికంలో బంగారానికి డిమాండ్ పెరిగింది. జూన్ త్రైమాసికంలో 76.1 టన్నుల గోల్డ్ డిమాండ్ ఏర్పడింది. గత ఏడాది ఇదే కాలంలో 63.8 టన్నులతో పోలిస్తే ఇది 19.2 శాతం వృద్ధి నమోదు చేసింది. మార్చి త్రైమాసికంతో పోలిస్తే డిమాండ్ 46 శాతం క్షీణించింది. గత ఏడాది ఏప్రిల్-జూన్ కాలంలో దేశవ్యాప్త లాక్ డౌన్ కారణంగా జ్యువెల్లరీ దుకాణాలు సహా అన్నీ బంద్ ఉన్నాయి. దీంతో అమ్మకాలపై ప్రభావం పడింది. కరోనా సెకండ్ వేవ్ పరిణామాల వల్ల ఈసారి కూడా సేల్స్ కాస్త తగ్గాయని వరల్డ్ గోల్డ్ కౌన్సిల్ తెలిపింది. అక్షయ తృతీయ, పెళ్లిళ్ల సీజన్ నేపథ్యంలోను డిమాండ్ కనిపించలేదని వెల్లడించింది.

వ్యాల్యూ ప్రకారం ఈ క్యాలెండర్ ఏడాది ఏప్రిల్-జూన్ త్రైమాసికంలో రూ.32,810 కోట్ల అమ్మకాలు నమోదయ్యాయి. ఏడాది క్రితం ఇదే కాలంలో రూ.26,600 కోట్లతో పోలిస్తే 23 శాతం అధికం. 2021 క్యాలెండర్ ఏడాది మొదటి ఆరు నెలల కాలంలో 157.6 టన్నుల డిమాండ్ కనిపించగా, 2019 ఇదే కాలంతో పోలిస్తే 46 శాతం అధికం. జూన్ త్రైమాసికంలో ఆభరణాల డిమాండ్ 25 శాతం పెరిగి 55.1 టన్నులకు చేరుకుంది. వ్యాల్యూ పరంగా 29 శాతం వృద్ధి నమోదు చేసి 23,750 కోట్లకు చేరుకుంది.

పెట్టుబడుల పరంగా బంగారం డిమాండ్ ఆరు శాతం పెరిగి 21 టన్నులుగా నమోదయింది. వ్యాల్యూపరంగా 10 శాతం వృద్ధితో రూ.8250 కోట్ల నుండి రూ.9060 కోట్లకు చేరుకుంది. కరోనా పరిస్థితులు సద్దుమణిగితే డిమాండ్ మళ్లీ భారీగా పుంజుకుంటుందని వరల్డ్ గోల్డ్ కౌన్సిల్ చెబుతోంది. వ్యాక్సీన్ వేగం, సీరో సర్వే ఫలితాల ఆధారంగా చూస్తే ఆర్థిక కార్యకలాపాలు పుంజుకుంటున్నట్లుగా తేలుతోందని, ఈ నేపథ్యంలో విక్రయాలు మళ్లీ పుంజుకుంటాయని చెబుతున్నారు.

ఇదిలా ఉండగా బంగారం ధరలు నేడు స్వల్పంగా తగ్గాయి. నిన్న భారీగా పెరిగిన గోల్డ్ ఫ్యూచర్స్ నేడు అతి స్వల్ప తగ్గుదల లేదా స్థిరంగా ఉంది.దేశీయ, అంతర్జాతీయ మార్కెట్లో గత రెండు నెలల కాలంలో ఈ వారంలోనే బంగారం ధరలు భారీగా పెరిగాయి. అంతర్జాతీయ ఫ్యూచర్ మార్కెట్ కామెక్స్‌లో గోల్డ్ ఫ్యూచర్స్ నిన్న ఏకంగా 1830 డాలర్లను దాటి 1850 డాలర్ల దిశగా కనిపించింది. అయితే నేడు స్వల్పంగా తగ్గుదలను నమోదు చేసింది.

ఎంసీఎక్స్‌లో గోల్డ్ ఫ్యూచర్స్ రూ.48,000ను క్రాస్ చేసింది. నిన్న రూ.48,300కు సమీపంలో ముగిసింది. నేడు మధ్యాహ్నం సెషన్లో ఆగస్ట్ గోల్డ్ ఫ్యూచర్స్ రూ.48.00 క్షీణించి రూ.48,233.00 వద్ద ట్రేడ్ అయింది. అక్టోబర్ గోల్డ్ ఫ్యూచర్స్ రూ.48412.00 వద్ద ట్రేడ్ అయింది. సెప్టెంబర్ సిల్వర్ ఫ్యూచర్స్ రూ.34.00 నష్టపోయి రూ.68166.00 వద్ద, డిసెంబర్ సిల్వర్ ఫ్యూచర్స్ రూ.42.00 క్షీణించి రూ.69004.00 వద్ద ముగిసింది.

అంతర్జాతీయ మార్కెట్లోను బంగారం ధర నేడు మధ్యాహ్నం సమయానికి 1828 డాలర్ల వద్ద కదలాడింది. గోల్డ్ ఫ్యూచర్స్ నేటి మధ్యాహ్నం సెషన్లో 2.60 డాలర్లు తగ్గి 1,828.60 డాలర్ల వద్ద ట్రేడ్ అయింది. సిల్వర్ ఫ్యూచర్స్ 0.134 డాలర్లు క్షీణించి 25.648 డాలర్ల వద్ద ట్రేడ్ అయింది.