దిగుమతి సుంకం ఎత్తివేయాలి, ఉద్యోగుల వేతన రాయితీ పెంచాలి: నిర్మలకు విజ్ఞప్తి

2021-22 ఆర్థిక సంవత్సరానికి గాను ఫిబ్రవరి 1వ తేదీన కేంద్ర ఆర్థికమంత్రి నిర్మలా సీతారామన్ బడ్జెట్ ప్రవేశ పెట్టే అవకాశముంది. ఇప్పటికే బడ్జెట్‌కు సంబంధించిన కసరత్తు సాగుతోంది. వివిధ రంగాలకు చెందిన ప్రముఖులను, పారిశ్రామికవేత్తలను, ఆర్థిక నిపుణులను బడ్జెట్ రూపకర్తలు సంప్రదిస్తున్నారు. వివిధ వర్గాల సూచనలు, సలహాలు స్వీకరిస్తున్నారు. భారత పరిశ్రమల సమాఖ్య (CII) సోమవారం పారిశ్రామిక రంగానికి సంబంధించి మరిన్ని ప్రోత్సాహకాలు అందించాలని కోరింది.

దిగుమతి సుంకాలు ఎత్తివేయాలి

దిగుమతులకు సంబంధించి రాబోయే మూడేళ్లకు గ్రేడెడ్ రోడ్ మ్యాప్ ప్రకటించాలని CII కేంద్ర ఆర్థికమంత్రి నిర్మలా సీతారామన్‌‍ను కోరుతూ ఆదివారం జాబితా విడుదల చేసింది. ముడి పదార్థాలపై దిగుమతి సుంకాలు పూర్తిగా ఎత్తివేయాలని కోరింది. తప్పనిసరి అనుకుంటే ముడి పదార్థాలపై జీరో నుండి 2.5 శాతం, ఫినిష్డ్ గూడ్స్ పైన 5 శాతం నుండి 7.5 శాతం, ఇంటర్మీడియేట్స్ పైన 2.5 శాతం నుండి 5 శాతం మించకూడదని విజ్ఞప్తి చేసింది. దీంతో అంతర్జాతీయ కంపెనీలు తమ ఉత్పత్తి యూనిట్లను భారత్‌కు తరలించి, మన ఎగుమతులు పెరిగేందుకు దోహదపడతాయని పేర్కొంది.

వేతనాలపై రాయితీ పెంచాలి

దేశంలో ఉపాధి అవకాశాలు పెంచేందుకు కొత్త ఉద్యోగుల వేతనాలపై ఇస్తోన్న రాయితీని మరింత పెంచాలని విజ్ఞప్తి చేసింది. ప్రస్తుతం ఉన్నత నైపుణ్యాలు ఉన్న ఉద్యోగులకు చెల్లించే జీతాల్లో కంపెనీలు మూడేళ్ల వరకు 30% పన్ను రాయితీ క్లెయిమ్ చేసుకోవచ్చు. అయితే నెలవారీ జీతం రూ.25,000 వరకు పరిమితం. వచ్చే బడ్జెట్లో దీనిని రూ.50,000కు పెంచాలని కోరింది.

క్లిష్టమైన బడ్జెట్

భారతీయ బ్యాంకుల బ్యాడ్ లేదా డౌట్‌ఫుల్ రుణాలకు సంంధించిన ప్రొవిజన్స్‌ను 8.5 శాతం నుండి 15 శాతానికి పెంచాలని కోరింది. ఆర్థిక వ్యవస్థ వృద్ధి రికవరీకి అవసరమైన చర్యలు బడ్జెట్‌లో ఉండాలని కోరింది. కరోనా కారణంగా పలు రంగాలు కుదేలాన విషయం తెలిసిందే. ఈ నేపథ్యంలో ప్రస్తుత బడ్జెట్ నిర్మలా సీతారామన్‌కు ఎంతో క్లిష్టమైనదేనని ఆర్థిక రంగ నిపుణులు అభిప్రాయపడుతున్నారు.