జీఎస్టీ ట్యాక్స్‌పేయర్స్‌కు భారీ ఊరట, ఆలస్య రుసుం రూ.500 మాత్రమే!

జీఎస్టీ చెల్లింపుదారులకు ప్రభుత్వం భారీ ఊరట కల్పించింది. జీఎస్టీ 3బీ రిటర్న్స్ దాఖలుకు సంబంధించి ఆలస్య రుసుమును తగ్గించింది. దీంతో జూలై 2017 నుండి జూలై 2020 వరకు సంబంధించిన జీఎస్టీఆర్ 3బీ రిటర్న్స్‌ను ఈ ఏడాది సెప్టెంబర్ వరకు దాఖలు చేస్తే ఆలస్య రుసుమును గరిష్టంగా రూ.500గా ఉంటుంది. పన్ను చెల్లించనవసరం లేని పక్షంలో లేట్ ఫీ చెల్లించాల్సిన పని లేదని కూడా కేంద్ర పరోక్ష పన్నుల బోర్డు (CBIC) తెలిపింది.

తగ్గించిన ఆలస్య రుసుము ఈ ఏడాది సెప్టెంబర్ 30వ తేదీ వరకు దాఖలు చేసిన జీఎస్టీఆర్ 3బీకి మాత్రమే వర్తిస్తుందని CBIC శుక్రవారం తెలిపింది. కాగా, ఇందుకు సంబంధించి పలు రిప్రజెంటేషన్స్ రావడంతో ఈ నిర్ణయం తీసుకుంది. ఫిబ్రవరి 2020 నుండి ఏప్రిల్ 2020 వరకు ఉపశమనం ఇచ్చింది. మరియు జూలై 2017 నుండి జనవరి 2020 మధ్య రిటర్న్స్ పెండెన్సీపై కూడా ఉపశమనం కల్పించింది.

ప్రభుత్వం కల్పించిన ఈ ఉపశమనం ద్వారా రెండు విధాలుగా ప్రయోజనాలు ఉన్నాయని ట్యాక్స్ టెక్నాలజీ కంపెనీ టీఎంఎస్ఎల్ ఫౌండర్ పార్ట్‌నర్ జిగార్ దోషి అన్నారు. బ్యాక్ లాగ్ రిటర్న్స్ క్లియర్ చేసుకోవడంతో పాటు, పన్ను చెల్లింపుదారులకు కొంత వర్కింగ్ క్యాపిటల్ రిలీఫ్ ప్రయోజనం కలుగుతుందని చెప్పారు. కరోనా - లాక్ డౌన్ నేపథ్యంలో మార్చి 25వ తేదీన ప్రారంభమైన లాక్ డౌన్ దాదాపు మూడు నెలలు కొనసాగింది. ఆ తర్వాత క్రమంగా ఆంక్షలు ఎత్తివేస్తూ, ఇప్పుడు ఆన్-లాక్ 2 కొనసాగుతోంది.