లక్నో: బహుజన సమాజ్‌వాదీ పార్టీ (BSP) అధినేత్రి, యూపీ మాజీ ముఖ్యమంత్రి మాయావతికి షాక్ తగిలింది. ఆమె సోదరుడు, పార్టీ జాతీయ ఉపాధ్యక్షుడు ఆనంద్ కుమార్, ఆయన భార్యకు చెందిన రూ.400 కోట్ల ఆస్తులను ఆదాయ పన్ను శాఖ ఢిల్లీ విభాగం అటాచ్ చేసింది.

ఆనంద్ కుమార్, అతని భార్య విచితేర్ లత పేరు పైన 7 ఎకరాల ప్లాట్ ప్రయోజనంగా పొందారని తెలుస్తోంది. దీనిని స్వాధీనం చేసుకునేందుకు ఢిల్లీకి చెందిన ఆదాయపన్ను శాఖ ప్రొహిబిషన్ యూనిట్ మంగళవారం ఉత్తర్వులు జారీ చేసింది. మాయావతి ఇటీవలే తన సోదరుడిని బీఎస్పీ నేషనల్ వైస్ ప్రెసిడెంట్‌గా అపాయింట్ చేశారు.

బినామీ ఆస్తి లావాదేవీల నిషేధ చట్టం, 1988 ప్రకారం జులై 16వ తేదీన తాత్కాలిక నోటీసులు జారీ చేశామని ఆదాయపన్ను శాఖ అధికారులు తెలిపారు. నోయిడాలో ఏడు ఎకరాల్లో విస్తరించిన ఉన్న ప్లాట్‌ను బినామీ ఆస్తిగా పరిగణించిన ఐటీ శాఖ ఈ నిర్ణయం తీసుకున్నట్లు తెలిపారు. దీని విలువ దాదాపు రూ.400 కోట్లు.