నరేంద్ర మోడీ రెండోసారి ప్రధాని అయితే ఆర్థిక శాఖను ఎవరికి ఇస్తారనే చర్చ సాగుతోంది. ఇన్నాళ్లు ఆర్థికమంత్రిగా అరుణ్ జైట్లీ ఉన్నారు. ఎగ్జిట్ పోల్ ఫలితాలు ఎన్డీయేకు అనుకూలంగా ఉన్నాయి. అరుణ్ జైట్లీ ఆరోగ్యం సహకరించకుంటే ఎవరు ఈ పదవిని చేపడతారని ఆర్థిక, వ్యాపార వర్గాల్లో చర్చనీయాంశంగా మారాయి.

అనారోగ్య సమస్యలతో ఇటీవల ఇబ్బందులు పాలైన అరుణ్ జైట్లీ తన పదవిని నిలబెట్టుకుంటారా? అనేది ఇప్పుడు ప్రశ్నగా మారింది. మోడీ కేబినెట్లో కీలకమైన నాయకుడు, లాయర్, ట్రబుల్‌ షూటర్ అయిన జైట్లీకే మళ్లీ ఆర్థికమంత్రి పగ్గాలు అప్పగించే అవకాశముందని పలువురు విశ్లేషకులు భావిస్తున్నారు.

అయితే, అనారోగ్య కారణాల వల్ల అనుకోని పరిస్థితుల్లో రైల్వే, కోల్ మినిస్టర్ పీయూష్ గోయల్ ఆర్థిక మంత్రిగా బాధ్యతలు స్వీకరించే అవకాశాలు లేకపోలేదని అంటున్నారు. ఇప్పటికే ఆయన జైట్లీ స్థానంలో తాత్కాలిక ఆర్థికమంత్రిగా బాధ్యతలను విజయవంతంగా నిర్వర్తించారు. కాబట్టి మొదటి ప్రాధాన్యం ఆయనకే ఉంటుందని భావిస్తున్నారు.

ప్రధాని కార్యాలయం ద్వారానే ముఖ్యమైన నిర్ణయాలు ఉంటాయి. కాబట్టి ఆర్థికమంత్రి ఎవరనే పట్టింపు పెద్దగా ఉండదని కేర్ రేటింగ్స్ చీఫ్ ఎకనమిస్ట్ మదన్ శబ్నావిస్ అన్నారు. ఎన్డీయే లేదా ఎన్డీయేతర ప్రభుత్వమా అనేదే స్టాక్ మార్కెట్లకు చాలా కీలకమని చెప్పారు.