కండిషన్స్ అప్లై: ఎన్నికల రోజు ఓటేసి సిరా చుక్క చూపిస్తే పెట్రోల్, డీజిల్‌పై డిస్కౌంట్!

లీటర్ పెట్రోల్ పైన ఎంత డిస్కౌంట్ అంటే?

లీటరు పెట్రోల్, డీజిల్ రేట్లపై 50 పైసలు డిస్కౌంట్ ఇస్తారు. మీరు ఎన్ని లీటర్లు తీసుకుంటే అన్ని లీటర్లకు.. ఒక్కో లీటరుకు రూ.50 పైసల చొప్పున డిస్కౌంట్ ఉంటుంది. ఓటు వేసినట్లుగా సిరా చుక్క చూపిస్తే ఈ డిస్కౌంట్ ఇస్తారు. ఈ మేరకు గత శుక్రవారం ఆల్ ఇండియా పెట్రోలియం డీలర్స్ అసోసియేషన్ ప్రెసిడెంట్ అజయ్ బన్సాల్ వెల్లడించారు.

పోలింగ్ విజయవంతం కోసం

ప్రజాస్వామ్య పండుగ పోలింగ్‌ను విజయవంతం చేసేందుకు తమ వంతు కృషిలో భాగంగా ఈ డిస్కౌంట్ ఇస్తున్నట్లు ఆయన చెప్పారు. ప్రజలను ఓటు హక్కు వేయడంలో భాగస్వాములుగా చేసేందుకు తమ వంతు ప్రయత్నమని చెప్పారు. ఇదివరకు ఢిల్లీలో ఈ ఆఫర్ ఇచ్చారు. కానీ తాజాగా శుక్రవారం నాడు 24 రాష్ట్రాల అసోసియేషన్ హెడ్స్ భేటీ అయ్యారు. పోలింగ్ రోజున పెట్రోల్, డీజిల్ పైన డిస్కౌంట్ ఇవ్వాలని ఏకగ్రీవంగా తీర్మానం చేశారు.

పలు నియోజకవర్గాల్లో వెసులుబాటు

ఈ ఆఫర్ కేవలం ఎంపిక చేసిన పెట్రోల్ బంక్‌లలో లభిస్తుంది. ఆయా రాష్ట్రాల్లో ఆయా పోలింగ్ తేదీల్లో ఉదయం 8 గంటల నుంచి రాత్రి 8 గంటల వరకు దేశంలోని పలు నియోజకవర్గాల్లో ఈ వెసులుబాటు ఉంది. పెట్రోల్, డీజడిల్ పట్టే వ్యక్తికి పేరు, మొబైల్ నెంబర్ కూడా ఇవ్వాలి. డిస్కౌంట్ ధరకే పెట్రోల్, డీజిల్ అందించే రిటైలర్లు ఈ డిస్కౌంట్‌ను డీలర్ కమిషన్‌లో అడ్జస్ట్ చేసుకుంటారు.