న్యూఢిల్లీ: పూర్తి స్వదేశీ పరిజ్ఞానంతో తయారు చేసిన ట్రెయిన్ 18కు కేంద్ర ప్రభుత్వం ఆదివారం నామకరణం చేసింది. ఈ రైలును వందే భారత్‌ ఎక్స్‌ప్రెస్‌‌గా పేరు పెట్టింది. కేంద్ర రైల్వేశాఖ మంత్రి పీయూష్‌ గోయల్‌ ఈ పేరును ప్రకటించారు.

ఢిల్లీ-వారణాసి మధ్య ఈ రైలు గంటకు 160కి.మీ. వేగంతో ప్రయాణిస్తుంది. గరిష్ఠ వేగం గంటకు 180 కి.మీ. ప్రధాని నరేంద్ర మోడీ త్వరలో ఈ రైలుకు పచ్చజెండా ఊపనున్నారు. 16 కోచ్‌లు కలిగిన ఈ రైలును అత్యాధునిక హంగులతో తీర్చిదిద్దారు. పూర్తి ఎయిర్‌ కండిషన్డ్ సదుపాయం ఉంది. ఈ రైలు కాన్పూర్‌, అలహాబాద్‌లో ఆగుతుంది.

ఈ రైలుకు పేరు పెట్టాలని ప్రజల నుంచి కోరగా, ఎన్నో ప్రతిపాదనలు వచ్చాయని, ఇందులో నుంచి వందే భారత్ ఎక్స్‌ప్రెస్‌ను తీసుకున్నామని పీయూష్ గోయల్ చెప్పారు. గణతంత్ర దినోత్సవం సందర్భంగా ప్రధాని ప్రజలకు ఇచ్చిన బహుమతి అన్నారు.