ఎగుమతుల్లో క్షీణత ఉద్యోగాలకు పొగ‌బెడుతోంది.. ఎగుమతులు తగ్గిపోయినందు వల్ల 2015-16 సంవత్సరం రెండో త్రైమాసికంలో 70 వేల మంది ఉపాధిని కోల్పోయినట్టు అసోచామ్‌, థాట్‌ ఆర్బిట్రేజ్‌ నివేదిక వెల్లడించింది.

టెక్స్‌టైల్స్ రంగంపై ఈ ప్ర‌భావం ఎక్కువ‌గా ఉంది. ఇలాంటి పరిణామాలు ఇక‌ముందు చోటు చేసుకోకుండా ఉండాలంటే దేశీయంగానే డిమాండ్‌ పెరగాల్సి ఉంటుందని, అప్పుడు ఎగుమతులు లేకున్నా దేశీయంగా వ్యాపార కార్యకలాపాల వృద్ది కార‌ణంగా ఉపాధి అవకాశాలు కోల్పోయే ఆస్కారం ఉందని నివేదిక సూచించింది. ఎగుమతుల్లో క్షీణత వల్ల టెక్స్‌టైల్‌ రంగంపై తీవ్ర ప్రభావం పడింది. ఈ రంగంలో ఎక్కువగా కాంట్రాక్టు ఉద్యోగులను తొలగించిన‌ట్లు అధ్య‌యనంలో పేర్కొన్నారు. అంతర్జాతీయ మార్కెట్లో గిరాకీ మందగించడం వల్ల ఎగుమతులపై ఆధారపడిన అనేక రంగాలు తమ సిబ్బంది సంఖ్యను తగ్గించివేశాయి. 2014 డిసెంబర్‌ నుంచి 2016 మార్చి వరకు ఎగుమతుల్లో క్షీణ‌త న‌మోదు అవుతూ వ‌స్తోంది. అంతర్జాతీయ మార్కెట్లో డిమాండ్‌ లేకపోవడం, ముడిచమురు ధరలు తగ్గడం వంటి అంశాలు ఎగుమతులను దెబ్బతీశాయి. 2016 ఆగ‌స్టు నెల‌లో వ‌రుస‌గా రెండో నెల ఎగుమ‌తులు 0.3% క్షీణించి 21.51 బిలియ‌న్ డాల‌ర్ల‌కు త‌గ్గాయి.