Financial planning: ఉద్యోగం ఊడినా, ఖర్చులు పెరిగినా టెన్షన్ పడకుండా ఉండాలంటే ఇలా చేయండి!

ప్రస్తుతం ఎక్కడ చూసినా లేఆఫ్స్ వార్తలు, పెరిగిపోతున్న నిత్యావసర ధరలు, స్టాక్ మార్కెట్ ఒడిదుడుకులు సామాన్యుడిని భయపెడుతున్నాయి. రేపు ఏం జరుగుతుందో తెలియని ఇలాంటి పరిస్థితుల్లో చాలామంది చేసే పెద్ద తప్పు.. కంగారుపడిపోయి తప్పుడు నిర్ణయాలు తీసుకోవడం. అయితే తెలివైన ఫైనాన్షియల్ ప్లానింగ్ (Financial planning) అంటే కేవలం ఎక్కువ లాభాలు సంపాదించడం మాత్రమే కాదు, కష్టకాలం వచ్చినప్పుడు కుప్పకూలిపోకుండా నిలబడటం. మీ ఆర్థిక జీవితాన్ని స్థిరంగా ఉంచుకోవడానికి ఇక్కడ కొన్ని ముఖ్యమైన సూత్రాలు ఉన్నాయి.

ఎమర్జెన్సీ ఫండ్‌ ను పెంచుకోండి

సాధారణంగా మూడు నుండి ఆరు నెలల ఖర్చులకు సరిపడా డబ్బును అత్యవసర నిధిగా ఉంచుకోవాలని చెబుతుంటారు. కానీ, పరిస్థితులు ఆందోళనకరంగా ఉన్నప్పుడు ఆ నిధిని మరికొంత పెంచుకోవడం మంచిది. ఈ డబ్బు మీకు లాభాలు ఇవ్వకపోవచ్చు, కానీ ఉద్యోగం పోయినా లేదా ఆకస్మిక వైద్య ఖర్చులు వచ్చినా మిమ్మల్ని అప్పుల పాలు కాకుండా కాపాడుతుంది. ఇది కేవలం నగదు మాత్రమే కాదు. మీకు మానసిక ప్రశాంతతను ఇచ్చే ఒక ఇన్సూరెన్స్ లాంటిది.

అనవసర ఖర్చులకు చెక్ పెట్టండి

జీవనశైలిని ఒక్కరోజులోనే మార్చుకోవాల్సిన అవసరం లేదు. కానీ, మీ జేబుకు పడుతున్న చిన్న చిన్న చిల్లులను గమనించండి. మీరు వాడని సబ్‌స్క్రిప్షన్లు, అనవసరమైన ఆన్‌లైన్ షాపింగ్, ప్రీమియం సర్వీసులు వంటివి మెల్లగా మీ డబ్బును తినేస్తాయి. ఇలాంటి చిన్న చిన్న ఖర్చులను తగ్గించుకోవడం వల్ల నెల చివరికి మీ దగ్గర కొంత అదనపు సొమ్ము మిగులుతుంది. ఇది కఠినమైన పొదుపు కంటే చాలా సులభం , దీర్ఘకాలం పాటించవచ్చు.

ఆదాయ మార్గాలను పెంచుకోండి

ఒకే ఉద్యోగం లేదా ఒకే రకమైన పెట్టుబడి మీద ఆధారపడటం రిస్క్ తో కూడుకున్న పని. అనిశ్చితి పెరిగినప్పుడు ఆ ఒక్క ఆధారం దెబ్బతింటే కోలుకోవడం కష్టం. అందుకే, ఏదైనా ఒక చిన్న సైడ్ బిజినెస్ లేదా పార్ట్ టైమ్ స్కిల్ ద్వారా అదనపు ఆదాయం వచ్చేలా ప్లాన్ చేసుకోండి. దీనివల్ల ఒక మార్గం మూసుకుపోయినా, మరో మార్గం మిమ్మల్ని ఆదుకుంటుందనే ధైర్యం ఉంటుంది.

అప్పుల భారాన్ని తగ్గించుకోండి

ఆర్థికంగా ఇబ్బందులు వస్తున్నాయని అనిపించినప్పుడు, అధిక వడ్డీ ఉన్న అప్పులను (ముఖ్యంగా క్రెడిట్ కార్డ్ అప్పులు) వీలైనంత త్వరగా తీర్చడానికి ప్రయత్నించండి. నెలవారీ ఈఎంఐల భారం తగ్గితే, మీ చేతిలో మిగిలే నగదు పెరుగుతుంది. ఇది మీ ఖర్చులను సర్దుబాటు చేసుకోవడానికి మరింత వెసులుబాటును కల్పిస్తుంది.

ఇన్సూరెన్స్‌ తో రక్షణ కల్పించుకోండి

ఒక్క మెడికల్ ఎమర్జెన్సీ మీ జీవితకాల పొదుపును తుడిచిపెట్టగలదు. అందుకే కంపెనీ ఇచ్చే హెల్త్ ఇన్సూరెన్స్‌తో పాటు, వ్యక్తిగతంగా మంచి హెల్త్ , లైఫ్ ఇన్సూరెన్స్ పాలసీలను కలిగి ఉండటం చాలా ముఖ్యం. ఇది విపత్కర పరిస్థితుల్లో మీ కుటుంబానికి రక్షణ కవచంలా పనిచేస్తుంది.

చివరిగా చెప్పాలంటే, ప్రతి వార్తకు స్పందించి ఇన్వెస్ట్‌మెంట్లను అమ్మేయడం లేదా రిస్క్ తీసుకోవడం మానుకోండి. పక్కా ప్లానింగ్ అంటే ముందే అన్నీ ఊహించడం కాదు, ఏది జరిగినా తట్టుకోగలిగేలా సిద్ధంగా ఉండటం. ఓపిక , క్రమశిక్షణతో కూడిన ఫైనాన్షియల్ ప్లానింగ్ (Financial planning) మాత్రమే మిమ్మల్ని ఆర్థిక సంక్షోభాల నుండి గట్టెక్కించగలదు.