పన్ను చెల్లింపుదారులకు గుడ్ న్యూస్.. ITR-1, ITR-4 ఫైలింగ్ యుటిలిటీస్ అందుబాటులోకి..

ఆదాయపు పన్ను శాఖ 2025-26 ఆర్థిక సంవత్సరానికి (అసెస్మెంట్ సంవత్సరం 2026-27) గాను ఐటీఆర్-1, ఐటీఆర్-4 ఎక్సెల్ ఆఫ్‌లైన్ యుటిలిటీలను అధికారికంగా అందుబాటులోకి తెచ్చింది. పన్ను చెల్లింపుదారులు ఈ యుటిలిటీలను ఆదాయపు పన్ను శాఖకు చెందిన అధికారిక ఇ-ఫైలింగ్ పోర్టల్ నుండి ఉచితంగా డౌన్‌లోడ్ చేసుకోవచ్చు.

ఈ యుటిలిటీల విడుదలతో ప్రస్తుత సంవత్సరానికి ఐటీఆర్ ఫైలింగ్ ప్రక్రియ అధికారికంగా ప్రారంభమైనట్లయింది. గడువు తేదీ అయిన జూలై 31వ తేదీ వరకు వేచి చూడకుండా, చివరి నిమిషంలో వచ్చే సాంకేతిక ఇబ్బందులు లేదా తొందరపాటును నివారించడానికి పన్ను చెల్లింపుదారులు తమ ఫైలింగ్ ప్రక్రియను ఇప్పుడే ముందుగానే ప్రారంభించేందుకు ఈ నిర్ణయం ఎంతగానో దోహదపడుతుంది.

ఈ ఆఫ్‌లైన్ ఎక్సెల్ యుటిలిటీలను ఉపయోగించడం చాలా సులభం. పన్ను చెల్లింపుదారులు తమ ఆదాయ వివరాలు, వర్తించే మినహాయింపులు, చెల్లించిన పన్నుల సమాచారాన్ని ఇంటర్నెట్ లేకపోయినా ఆఫ్‌లైన్‌లోనే ఈ ఎక్సెల్ షీట్‌లో నమోదు చేసుకోవచ్చు. ఈ యుటిలిటీ సాఫ్ట్‌వేర్ పన్ను మొత్తాన్ని ఆటోమేటిక్‌గా లెక్కిస్తుంది.

వివరాలన్నీ సరిచూసుకున్న తర్వాత పన్ను చెల్లింపుదారులు దాని నుండి ఒక 'JSON' ఫైల్‌ను సిద్ధం చేసుకోవాలి. ఆ తర్వాత ఇంటర్నెట్ ఆన్ చేసి, ఆదాయపు పన్ను ఇ-ఫైలింగ్ వెబ్‌సైట్‌లోకి లాగిన్ అయి, ఈ జేసన్ (JSON) ఫైల్‌ను అప్‌లోడ్ చేయడం ద్వారా తమ రిటర్న్‌ల సమర్పణ, ఈ-వెరిఫికేషన్ ప్రక్రియను విజయవంతంగా పూర్తి చేయవచ్చు.

సాధారణంగా ఆదాయపు పన్ను శాఖలో పన్ను చెల్లింపుదారుల వర్గం, ఆదాయ వనరులు, మొత్తం సంపాదన ఆధారంగా ఐటీఆర్-1 నుండి ఐటీఆర్-7 వరకు మొత్తం ఏడు రకాల ఫారాలు అందుబాటులో ఉన్నాయి. వీటిలో ఇప్పుడు విడుదలైన ఐటీఆర్-1, ఐటీఆర్-4 ఫారాలు చిన్న పన్ను చెల్లింపుదారులకు అత్యంత కీలకమైనవి. ఇందులో ఐటీఆర్-1 ఫారమ్‌ను 'సహజ్' అని కూడా పిలుస్తారు.

Also Read

Tax rules: ఏప్రిల్ నుండి కొత్త పన్ను నిబంధనలు! మీరు తెలుసుకోవాల్సిన ముఖ్య విషయాలు ఇవే!

ఇది వార్షిక ఆదాయం రూ. 50 లక్షల లోపు ఉండి, కేవలం జీతం లేదా పెన్షన్, గరిష్టంగా రెండు ఇళ్ల ద్వారా వచ్చే అద్దె ఆదాయం, బ్యాంక్ డిపాజిట్లపై వచ్చే వడ్డీ వంటి ఇతర వనరుల ద్వారా సంపాదన ఉన్న భారతీయ నివాసితులకు వర్తిస్తుంది. అలాగే రూ. 5,000 లోపు వ్యవసాయ ఆదాయం ఉన్నవారు, సెక్షన్ 112A కింద రూ. 1.25 లక్షల వరకు దీర్ఘకాలిక మూలధన లాభాలు (LTCG) పొందిన వారు కూడా ఐటీఆర్-1 ఫారమ్‌ను ఉపయోగించవచ్చు.

మరోవైపు ఐటీఆర్-4 ఫారమ్‌ను 'సుగమ్' అని పిలుస్తారు. ఇది వ్యాపారస్తులు, నిపుణుల కోసం ఉద్దేశించబడింది. వార్షిక ఆదాయం రూ. 50 లక్షల లోపు ఉండి, ఆదాయపు పన్ను చట్టంలోని సెక్షన్లు 44AD, 44ADA లేదా 44AE కింద 'అంచనా ఆధారిత పన్ను విధానాన్ని' (Presumptive Taxation Scheme) ఎంచుకునే నివాస వ్యక్తులు, హిందూ అవిభక్త కుటుంబాలు (HUF), భాగస్వామ్య సంస్థలు (LLPలు మినహా) ఈ ఫారమ్‌ను ఉపయోగించి తమ రిటర్న్‌లను దాఖలు చేయాల్సి ఉంటుంది.

ఐటీఆర్-1 లాగే ఈ ఫారమ్‌లో కూడా సెక్షన్ 112A కింద ₹ 1.25 లక్షల వరకు దీర్ఘకాలిక మూలధన లాభాలు ఉన్నవారికి ఫైలింగ్ చేసుకునే వెసులుబాటు కల్పించారు. దీనివల్ల జీతగాళ్లు, చిన్న వ్యాపారులు తమకు వర్తించే ఫారమ్‌ను ఎంచుకుని సులభంగా పన్ను రిటర్న్‌లను సమర్పించవచ్చు.