ఫ్రీలాన్స్ ఆదాయం ఉందా.. ITR ఫైలింగ్‌లో ఈ పొరపాట్లు అస్సలు చేయొద్దు

స్వయం ఉపాధి పొందే ఫ్రీలాన్సర్లు, కన్సల్టెంట్లు, ఇతర వృత్తి నిపుణులు తమ ఆదాయపు పన్ను రిటర్న్‌లను (ITR) దాఖలు చేసేటప్పుడు అత్యంత జాగ్రత్తగా వ్యవహరించాలని పన్ను నిపుణులు హెచ్చరిస్తున్నారు. కేవలం ఆదాయాన్ని నివేదించి పన్ను చెల్లించడమే కాకుండా.. సరైన ఐటీఆర్ ఫారమ్‌ను ఎంచుకోవడం, బ్యాంక్ స్టేట్‌మెంట్లు, జీఎస్టీ రికార్డులను ఐటీ శాఖ సమాచారంతో సరిపోల్చడం అత్యంత కీలకమని స్పష్టం చేస్తున్నారు. 2025-26 ఆర్థిక సంవత్సరానికి (అసెస్మెంట్ ఇయర్ 2026-27) గాను ఖాతాల ఆడిటింగ్ అవసరం లేని పన్ను చెల్లింపుదారులకు ఐటీఆర్ ఫైలింగ్ గడువు 2026 ఆగస్టు 31 తో ముగుస్తుంది.

రిటర్న్ దాఖలు చేసే సమయంలో చేసే చిన్న పొరపాటు కూడా పన్ను నోటీసులకు, రీఫండ్ ఆలస్యానికి లేదా చట్టబద్ధమైన మినహాయింపులను కోల్పోవడానికి దారితీస్తుందని నాంగియా & కో సీనియర్ పార్టనర్ నీరజ్ అగర్వాల్ తెలిపారు. సాధారణంగా నిపుణులు చేసే ప్రధాన పొరపాట్లలో తప్పుడు ఫారమ్‌ను ఎంచుకోవడం ప్రధానమైనది. రూ. 50 లక్షల వరకు ఆదాయం ఉండి, ఊహాత్మక పన్ను విధానాన్ని (Presumptive Taxation) ఎంచుకునే నిపుణులు ITR-4 (సుగం) ఫారమ్‌ను ఉపయోగించవచ్చు. అయితే, రూ. 1.25 లక్షలకు మించి దీర్ఘకాలిక మూలధన లాభాలు ఉన్నా, విదేశీ క్లయింట్ల నుండి ఆదాయం లేదా విదేశీ ఆస్తులు ఉన్నా, తప్పనిసరిగా ITR-3 ఫారమ్‌నే దాఖలు చేయాల్సి ఉంటుంది.

అలాగే ఊహాత్మక పన్ను విధానంలో సెక్షన్ 44AD మరియు 44ADA ల మధ్య వ్యత్యాసాన్ని గ్రహించడం ముఖ్యం. సెక్షన్ 44ADA నిపుణులకు వర్తిస్తుంది. ఇందులో స్థూల రాబడిలో కనీసం 50 శాతాన్ని ఆదాయంగా చూపాలి. డిజిటల్/నగదు రహిత చెల్లింపులు 95 శాతం ఉంటే దీని పరిమితి రూ. 75 లక్షల వరకు ఉంటుంది. సెక్షన్ 44ADA ఎంచుకున్నవారు ప్రత్యేకంగా ఆఫీసు లేదా వ్యాపార ఖర్చులను మినహాయింపుగా క్లేమ్ చేయలేరు; ఆ 50 శాతం మినహాయింపులోనే అన్ని ఖర్చులు కలిసి ఉంటాయని నిపుణులు గుర్తుచేస్తున్నారు.

Also Read

నేటి నుంచి కొత్త ఫైనాన్షియల్ రూల్స్.. పన్ను చెల్లింపుదారులు, ప్రయాణికులకు కీలక అప్‌డేట్..

మరొక ప్రధానమైన అంశం జీఎస్టీ (GST). క్లయింట్ల నుంచి వసూలు చేసిన జీఎస్టీ ప్రభుత్వానికి చెల్లించే పన్ను కాబట్టి, దానిని వృత్తిపరమైన మొత్తం రాబడి (Gross Receipts) లో చేర్చకూడదు. అలా చేర్చడం వల్ల టర్నోవర్ అనవసరంగా పెరిగి సమస్యలు తలెత్తుతాయి. ఐటీఆర్ సమర్పించే ముందే పన్ను చెల్లింపుదారులు తమ బ్యాంక్ రికార్డులు, యూపీఐ/ఆన్‌లైన్ చెల్లింపులను Form 26AS, AIS (Annual Information Statement) తో సరిపోల్చుకోవాలి. ఏవైనా తేడాలు ఉంటే సకాలంలో సరిదిద్దుకోవాలి.

పొదుపు ఖాతాల వడ్డీలు, డివిడెండ్లు, విదేశీ ఆదాయం మొదలైన వివరాలను దాచడం వల్ల జరిమానాలు పడే అవకాశం ఉంది. అలాగే, ఫ్యూచర్స్ అండ్ ఆప్షన్స్ (F&O) లేదా వ్యాపార నష్టాలను భవిష్యత్ సంవత్సరాలకు ముందుకు తీసుకువెళ్లాలనుకునేవారు ఆగస్టు 31 గడువులోపే ఐటీఆర్ దాఖలు చేయాలని నిపుణులు సూచిస్తున్నారు. సరైన పన్ను విధానాన్ని (New vs Old Tax Regime) ఎంచుకోవడం ద్వారా పన్ను భారాన్ని తగ్గించుకోవచ్చని స్పష్టం చేస్తున్నారు.