భారీ లావాదేవీలు చేస్తున్నారా? ఐటీ శాఖ నోటీసులు రాకుండా ఉండాలంటే ఈ విషయాలు తప్పక తెలుసుకోండి!

మీరు చేసే భారీ ఆర్థిక లావాదేవీలపై ఆదాయపు పన్ను శాఖ (IT) ఎప్పుడూ ఓ కన్నేసి ఉంచుతుంది. ఇందుకోసం యాన్యువల్ ఇన్ఫర్మేషన్ స్టేట్‌మెంట్ (AIS)ను వాడుతుంది. బ్యాంకులు, ఇతర ఆర్థిక సంస్థలు మీరు చేసే లావాదేవీల వివరాలను స్టేట్‌మెంట్ ఆఫ్ ఫైనాన్షియల్ ట్రాన్సాక్షన్స్ (SFT) ద్వారా ఐటీ శాఖకు చేరవేస్తాయి. పన్ను ఎగవేతదారులను గుర్తించడానికి, ఆదాయానికి మించి ఖర్చులు చేసే వారిని పట్టుకోవడానికి ఈ వ్యవస్థ ఉపయోగపడుతుంది. అనవసరమైన ఐటీ నోటీసులు రాకుండా ఉండాలంటే ఈ నిబంధనలపై అవగాహన ఉండటం చాలా ముఖ్యం.

ఒక ఆర్థిక సంవత్సరంలో మీ సేవింగ్స్ ఖాతాల్లో రూ. 10 లక్షలకు మించి నగదు జమ చేసినా లేదా విత్‌డ్రా చేసినా బ్యాంకులు ఆ విషయాన్ని ఐటీ శాఖకు రిపోర్ట్ చేస్తాయి. మీకున్న అన్ని సేవింగ్స్ అకౌంట్లను కలిపి ఈ పరిమితిని లెక్కిస్తారు. అదే కరెంట్ అకౌంట్ హోల్డర్లకైతే ఈ లిమిట్ రూ. 50 లక్షలుగా ఉంది. అలాగే, రూ. 10 లక్షలకు మించి ఫిక్స్‌డ్ డిపాజిట్లు (FD) చేసినా ఐటీ శాఖకు అలర్ట్ వెళ్తుంది. అందుకే మీ నగదు లావాదేవీల విషయంలో జాగ్రత్తగా ఉండటం అవసరం.

భారీ లావాదేవీలు.. పాన్ (PAN) కార్డుతో నిఘా!

మీరు రూ. 30 లక్షలు లేదా అంతకంటే ఎక్కువ విలువైన స్థలం లేదా ఇంటిని కొన్నా, అమ్మినా రిజిస్ట్రార్ కార్యాలయం ఆ వివరాలను ఐటీ శాఖకు అందిస్తుంది. అలాగే షేర్లు లేదా మ్యూచువల్ ఫండ్లలో రూ. 10 లక్షలకు మించి పెట్టుబడి పెట్టినప్పుడు కూడా రిపోర్ట్ వెళ్తుంది. మీ పాన్ (PAN) కార్డు ఆధారంగా ఈ లావాదేవీలన్నీ ట్రాక్ అవుతాయి. మీరు కొనే ఆస్తులు, మీ ఆదాయానికి సరిపోతున్నాయో లేదో తెలుసుకోవడమే ఈ నిఘా ముఖ్య ఉద్దేశం.

క్రెడిట్ కార్డ్ బిల్లుల చెల్లింపులపై కూడా ఐటీ శాఖ నిఘా ఉంటుంది. మీరు రూ. 1 లక్షకు మించి నగదు రూపంలో క్రెడిట్ కార్డ్ బిల్లు చెల్లిస్తే బ్యాంకులు రిపోర్ట్ చేస్తాయి. ఇక ఏడాది మొత్తంలో ఏ రూపంలోనైనా రూ. 10 లక్షలకు మించి బిల్లులు చెల్లిస్తే ఐటీ శాఖకు సమాచారం అందుతుంది. విదేశీ ప్రయాణాల కోసం రూ. 10 లక్షలకు మించి ఫారిన్ కరెన్సీ కొనుగోలు చేసినా ట్రాక్ చేస్తారు. ఆర్థిక పారదర్శకతను పెంచేందుకు ప్రభుత్వం ఈ చర్యలు తీసుకుంటోంది.

AIS ద్వారా నగదు లావాదేవీల పర్యవేక్షణ

లావాదేవీ రకం	రిపోర్టింగ్ పరిమితి
సేవింగ్స్ ఖాతాలో నగదు జమ	రూ. 10 లక్షల పైన
ఫిక్స్‌డ్ డిపాజిట్ (FD)	రూ. 10 లక్షల పైన
క్రెడిట్ కార్డ్ బిల్లు (మొత్తం)	రూ. 10 లక్షల పైన
ఆస్తి కొనుగోలు లేదా విక్రయం	రూ. 30 లక్షల పైన

మీ ఆర్థిక లావాదేవీల్లో ఎలాంటి తప్పులు దొర్లకుండా ఉండాలంటే క్రమం తప్పకుండా మీ AIS (Annual Information Statement) చెక్ చేసుకోవడం మంచిది. అందులో ఏదైనా తప్పుడు సమాచారం ఉంటే వెంటనే ఆన్‌లైన్‌లో ఫిర్యాదు చేయవచ్చు. మీ ఆర్థిక రికార్డులను పక్కాగా ఉంచుకుంటే ఐటీ రిటర్న్స్ దాఖలు చేసేటప్పుడు ఎలాంటి ఇబ్బందులు ఉండవు. ఇలా ముందుగానే అప్రమత్తంగా ఉండటం వల్ల మానసిక ప్రశాంతతతో పాటు ఐటీ నోటీసుల భయం కూడా ఉండదు.