Gold Prices Today: భారీగా తగ్గిన బంగారం ధరలు, మద్దతు ఎక్కడంటే?

బంగారం కొనుగోలుదారులకు కాస్త ఊరట! పసిడి ధరలు వరుసగా క్షీణిస్తున్నాయి. రష్యా-ఉక్రెయిన్ యుద్ధ సమయంలో రూ.55,000 క్రాస్ చేసిన గోల్డ్ ఫ్యూచర్స్, ఇటీవలే రూ.53,000 దాటి కొనుగోలుదారులకు షాకిచ్చింది. కానీ గత కొద్ది సెషన్‌లుగా తగ్గుతోంది. పసిడి (ఫ్యూచర్) ధరలు ఇప్పుడు రూ.52,000 దిగువకు వచ్చాయి. పరిస్థితులు ఇలాగే ఉంటే రూ.50,000 స్థాయికి రావొచ్చునని అంటున్నారు. గోల్డ్ ఫ్యూచర్ ధరలు ఆల్ టైమ్ గరిష్టం రూ.56,200తో పోలిస్తే రూ.4300 వరకు తక్కువగా ఉన్నాయి.

బంగారం, వెండి భారీగా డౌన్

అంతర్జాతీయ మార్కెట్ కామెక్స్, దేశీయ ఫ్యూచర్ మార్కెట్ మల్టీ కమోడిటీ ఎక్స్చేంజ్‌లో బంగారం ధరలు రెండు వారాల కనిష్టానికి చేరుకున్నాయి. గతవారం చివరలో నష్టపోయిన పసిడి ధరలు, ఇంకా ఒత్తిడిలోనే కొనసాగుతున్నాయి.

జూన్ గోల్డ్ ఫ్యూచర్స్ నేటి మధ్యాహ్నం సెషన్‌లో రూ.361 తగ్గి రూ.51,900 వద్ద, ఆగస్ట్ గోల్డ్ ఫ్యూచర్స్ రూ.391 క్షీణించి రూ.52,140 వద్ద ట్రేడ్ అయింది. సిల్వర్ ధరలు భారీగా తగ్గాయి. చాలా రోజులకు రూ.65,500 దిగువకు వచ్చాయి. నేడు మధ్యాహ్నం సెషన్‌లో రూ.1,086 తగ్గి రూ.65,460 వద్ద, జూలై సిల్వర్ ఫ్యూచర్స్ రూ.1,119 తగ్గి రూ.66,256 వద్ద ట్రేడ్ అయింది.

అంతర్జాతీయ మార్కెట్‌లో

అంతర్జాతీయ మార్కెట్‌లో పసిడి ధరలు 1920 డాలర్లకు దిగి వచ్చాయి. గోల్డ్ ఫ్యూచర్స్ 14 డాలర్లు క్షీణించి 1920 డాలర్ల వద్ద, సిల్వర్ ఫ్యూచర్స్ 0.374 డాలర్లు క్షీణించి 23,887 డాలర్ల వద్ద ట్రేడ్ అయింది. గతవారం ఓ సమయంలో 1980 డాలర్లు క్రాస్ చేసిన గోల్డ్ ఫ్యూచర్స్ నేడు ఓ సమయంలో 1913 డాలర్లకు కూడా పడిపోయింది. ఆల్ టైమ్ గరిష్టంతో 150 డాలర్లకు పైగా తక్కువగా ఉంది.

బంగారం ధరల నిరోధకం

బంగారం ధరలు రూ.51,800 వద్ద, వెండి ధరలు రూ.65,000 వద్ద మద్దతు కనిపిస్తోందని బులియన్ మార్కెట్ నిపుణులు చెబుతున్నారు. అంతర్జాతీయ మార్కెట్‌లో బంగారం 1920 డాలర్ల వద్ద మద్దతు కనిపిస్తోంది. బంగారం నిరోధకం రూ.52,500 నుండి రూ.52,600 మధ్య కనిపిస్తోంది. వెండి నిరోధకం రూ.66,700 నుండి రూ.67,300 మధ్య కనిపిస్తోంది.