Gold price today: పసిడి ధరలు ఎలా ఉన్నాయంటే, రూ.48,000 వద్ద నిరోధకం

నిన్న స్వల్పంగా పెరిగిన గోల్డ్ ఫ్యూచర్ నేడు దాదాపు స్థిరంగా ఉంది. దేశీయ ఫ్యూచర్ మార్కెట్ మల్టీ కమోడిటీ ఎక్స్చేంజ్(MCX)లో గోల్డ్ ఫ్యూచర్స్ క్రితం సెషన్‌లో రూ.100కు పైగా పెరిగింది. అయినప్పటికీ రూ.48,000 మార్కు దిగువనే ఉంది. నేడు (డిసెంబర్ 5, బుధవారం) ఎంసీఎక్స్‌లో ఫిబ్రవరి గోల్డ్ ఫ్యూచర్ రూ.9.00 క్షీణించి రూ.47,940 వద్ద, ఏప్రిల్ గోల్డ్ ఫ్యూచర్స్ రూ.22 తగ్గి రూ.48,034 వద్ద ట్రేడ్ అయింది. అంతర్జాతీయ మార్కెట్లోను క్రితం సెషన్‌లో స్వల్పంగా పెరిగింది. నిన్నటి సెషన్‌లో 1815 డాలర్ల వద్ద ముగిసిన గోల్డ్ ఫ్యూచర్స్, నేడు అదే స్థాయిలో ఉంది. సిల్వర్ ఫ్యూచర్స్ క్రితం సెషన్లో రూ.62,000 పైన ఉంది. నేడు స్వల్పంగా తగ్గినప్పటికీ ఈ మార్కుకు పైనే ఉంది. మార్చి సిల్వర్ ఫ్యూచర్స్ రూ.131 క్షీణించి రూ.62,095 వద్ద, కామెక్స్‌లో సిల్వర్ ఫ్యూచర్స్ 0.044 డాలర్లు నష్టపోయి 23.012 డాలర్ల వద్ద ట్రేడ్ అయింది.

పసిడిపై వీటి ప్రభావం

యూఎస్ డాలర్, అమెరికా బాండ్ యీల్డ్స్, ఒమిక్రాన్ అంశాలు పసిడి పైన ప్రభావం చూపుతున్నాయి. బలహీనమైన యూఎస్ డేటా నేపథ్యంలో డాలర్ బలహీనపడిందని, ఇది పసిడి ట్రెండ్‌కు సానుకూలంగా ఉందని బులియన్ మార్కెట్ నిపుణులు అంటున్నారు. అదే సమయంలో ద్రవ్యోల్భణ ఒత్తిళ్లు, పెట్టుబడి డిమాండ్ కూడా బంగారం ధరలకు మద్దతుగా కనిపిస్తోంది. ఈ నేపథ్యంలో పసిడిని రూ.47,500 వద్ద స్టాప్ లాస్ పెట్టుకొని, రూ.48,500 టార్గెట్ ధరతో, రూ.47,800 స్థాయిలో కొనుగోలు చేయవచ్చునని చెబుతున్నారు.

1800 డాలర్ల స్థాయిలో

బలహీనమైన అమెరికా డేటా, ద్రవ్యోల్భణ ఆందోళనలతో ఇన్వెస్టర్లు పసిడి వైపు చూస్తున్నారు. డాలర్ ఇండెక్స్ స్వల్పంగా క్షీణించింది. ఈ నేపథ్యంలో కామెక్స్‌లో స్పాట్ గోల్డ్ మద్దతు ధర 1800 డాలర్లు, నిరోధకస్థాయి 1830 డాలర్లుగా అంచనా వేస్తున్నారు. ఎంసీఎక్స్ గోల్డ్ ఫిబ్రవరి మద్దతు ధర రూ.47,800, నిరోధకస్థాయి రూ.48,300గా పేర్కొంటున్నారు.

బంగారం బై-జోన్ రూ.48,100, టార్గెట్ ధర రూ.48,300. సెల్ జోన్ రూ.47,800, టార్గెట్ ధర రూ.47,600.

ఆల్ టైమ్ గరిష్టంతో రూ.8200 తక్కువ

బంగారం ధరలు ప్రస్తుతం ఆల్ టైమ్ గరిష్టం రూ.56,200తో పోలిస్తే రూ.8200 వరకు తక్కువగా ఉన్నాయి. కొత్త క్యాలెండర్ ఏడాదిలో పసిడి దాదాపు స్థిరంగా కనిపిస్తోంది. 2022 తొలి అర్థ సంవత్సరంలో పసిడి రూ.45,000 స్థాయికి పడిపోతుందని, అయితే ఏడాది చివరి నాటికి మాత్రం రూ.55,000 స్థాయికి చేరుకోవచ్చునని బులియన్ మార్కెట్ నిపుణుల అంచనా.