Gold Prices Today: భారీగా పెరిగిన బంగారం ధరలు, మళ్లీ తగ్గుతాయా.. ఎందుకు?

ఫెడ్ రిజర్వ్ మీటింగ్ నేపథ్యంలో నిన్నటి వరకు అప్రమత్తంగా కదలాడిన బంగారం ధరలు ఆ తర్వాత పెరుగుతున్నాయి. మల్టీ కమోడిటీ ఎక్స్చేంజ్ (MCX)లో 10గ్రాముల గోల్డ్ ఫ్యూచర్స్ రూ.48,500 దిశగా పరుగు పెడుతోంది. ఫిబ్రవరి గోల్డ్ ఫ్యూచర్స్ నేటి (డిసెంబర్ 16) ప్రారంభ సెషన్‌లో రూ.268 పెరిగి రూ.48,355 వద్ద, ఏప్రిల్ గోల్డ్ ఫ్యూచర్స్ రూ.239 పెరిగి రూ.48,496 వద్ద ట్రేడ్ అయింది. రూ.60,000 స్థాయిలో ఉన్న వెండి ధర రూ.1000కి పైగా పెరిగింది. మార్చి సిల్వర్ ఫ్యూచర్స్ రూ.1,172.00 పెరిగి రూ.61,380 వద్ద, మే సిల్వర్ ఫ్యూచర్స్ రూ.1,124.00 పెరిగి రూ.61,962 వద్ద ట్రేడ్ అయింది.

అంతర్జాతీయ మార్కెట్లో...

అంతర్జాతీయ మార్కెట్లో నిన్న భారీగా తగ్గిన బంగారం ధరలు నేడు అదే స్థాయిలో పెరిగాయి. నేటి సెషన్లో గోల్డ్ ఫ్యూచర్స్ 17.60 డాలర్లు లేదా 1 శాతం పెరిగి 1782 డాలర్ల వద్ద ట్రేడ్ అయింది. సిల్వర్ ఫ్యూచర్స్ కూడా 22 డాలర్ల దిగువ నుండి ఇప్పుడు ఈ మార్కును క్రాస్ చేసింది. సిల్వర్ ఫ్యూచర్స్ 0.590 డాలర్లు పెరిగి 22.137 డాలర్లకు చేరుకుంది. వెండి ఏడాదిలో 11 శాతం క్షీణించగా, ఇదే కాలంలో బంగారం దాదాపు 5 శాతం తగ్గింది.

నిన్న భారీగా తగ్గి...

బంగారం ధరలు క్రితం సెషన్‌లో భారీగా తగ్గాయి. ఫెడ్ రిజర్వ్ మీటింగ్ నేపథ్యంలో అంతర్జాతీయ ఫ్యూచర్ మార్కెట్లో పసిడి ధరలు మొదట క్షీణించినప్పటికీ, నేడు మాత్రం పరుగు పెడుతోంది. నిన్న దేశీయ ఫ్యూచర్ మార్కెట్లో ఫిబ్రవరి గోల్డ్ ఫ్యూచర్స్ రూ.48,065 వద్ద, ఏప్రిల్ గోల్డ్ ఫ్యూచర్స్ రూ.48,263 వద్ద ముగిసింది. అంతర్జాతీయ మార్కెట్లో దారుణంగా పతనమై 1764 డాలర్ల వద్ద ముగిసింది. అయితే ఫెడ్ రిజర్వ్ అనంతరం మాత్రం బంగారం ధర పుంజుకుంది. ఈ ప్రభావం దేశీయ ప్యూచర్ మార్కెట్ పైన ఉంటుంది. దీంతో ఎంసీఎక్స్‌లో ధరలు పెరుగుతున్నాయి.

అందుకే పసిడికి సానుకూలత

ఫెడ్ బాండ్ టాపెరింగ్ వార్తలు వచ్చినప్పటికీ బంగారం ధరలు సానుకూలంగా కదలాడుతున్నాయి. ఫెడ్ మీటింగ్ నేపథ్యంలో బంగారం ధరలు మరింత పెరిగే అవకాశముందని, అయితే ఇది షార్ట్ టర్మ్ మాత్రమేనని బులియన్ మార్కెట్ నిపుణులు చెబుతున్నారు. ఆ తర్వాత మళ్లీ ధరలు తగ్గుతాయని అంచనా వేస్తున్నారు. 2022లోనే వడ్డీ రేట్ల పెంపుపై ఫెడ్ నిర్ణయం తీసుకోనున్న నేపథ్యంలో పసిడి ధరలు క్రమంగా తగ్గవచ్చునని అంటున్నారు. వడ్డీ రేట్లు క్రమంగా పెరుగుతాయనే అంశం పసిడికి తాత్కాలికంగా సానుకూలతను కలిగించిందని చెబుతున్నారు.