రిస్క్ త‌గ్గించుకునేందుకు బ్యాలెన్స్‌డ్ ఫండ్లు

ప్ర‌భుత్వ సంస్క‌ర‌ణ‌లు, ఆర్బీఐ చ‌ర్య‌ల కార‌ణంగా దేశీయ స్టాక్ మార్కెట్లు ఒడిదొడుకుల‌కు గుర‌వుతున్నాయి. గ‌త సంవ‌త్స‌రం నుంచి దూసుకెళుతున్న సూచీలు అప్పుడప్పుడు స‌ర్దుబాట్ల‌కు తావు ఇస్తున్నాయి. మే నెల‌లో బ్యాలెన్స్‌డ్ ఫండ్ల‌లో వ‌చ్చిన డబ్బు ఇంత‌కు ముందు ఏ నెల‌తో పోల్చి చూసినా అధిక‌మే. మొద‌టి సారి ఫండ్ల గురించి తెలిసి ఎక్కువ రిస్క్ తీసుకోలేని వారికి బ్యాలెన్స్‌డ్ ఫండ్లే మొద‌టి ఎంపిక‌. ఎందుకంటే ఇవి ఈక్విటీ, డెట్ క‌ల‌గ‌ల‌సిన పెట్టుబ‌డులు. మొత్తం ఫండ్ ఎన్ఏవీలో ఈక్విటీ విభాగం వ‌ల్ల వ‌చ్చిన త‌గ్గుద‌ల‌ను డెట్ విభాగం విలువ స‌రిచేస్తుంది.

Balanced fund

4 నుంచి 6 ఏళ్ల ల‌క్ష్యం క‌లిగిన వారు బ్యాలెన్స్‌డ్ ఫండ్ల దిశ‌గా చూడొచ్చు. స్వ‌ల్ప‌కాలిక ల‌క్ష్యాల‌కు బ్యాంకుల్లో పొదుపు చేసినా, దీర్ఘ‌కాలిక ల‌క్ష్యాల‌కు స్టాక్ మార్కెట్లు పెట్టుబ‌డుల‌ను ఆశ్ర‌యించినా, మ‌ధ్య‌కాలంలో మంచి రాబ‌డుల కోసం బ్యాలెన్స్‌డ్ ఫండ్లు మంచి ఎంపిక అని ఆర్థిక ప్ర‌ణాళిక నిపుణులు సూచిస్తున్నారు. బ్యాలెన్స్‌డ్ ఫండ్ల‌లో సైతం ఈక్విటీ ఆధారిత‌, డెట్ ఆధారిత అని రెండు ర‌కాల ఫండ్లు ఉంటాయి. మీకు స‌రైన ఎంపిక ఏదో చూసుకుని పెట్టుబ‌డి పెట్టండి.