రోడ్డు మీద ఈ బైక్ వెళ్తుంటే ప్రతి ఒక్కరూ సైడ్ తప్పుకోవాల్సిందే..అమ్మకాల్లో రికార్డుల సునామీ

ఇండియన్ రోడ్లపై రాయల్ ఎన్‌ఫీల్డ్ బైక్ కనిపిస్తే ఆ రాజసమే వేరు. ముఖ్యంగా రాయల్ ఎన్‌ఫీల్డ్ క్లాసిక్ 350(Royal Enfield Classic 350) మోడల్‌కు ఉన్న క్రేజ్ గురించి ఎంత చెప్పినా తక్కువే. తాజాగా విడుదలైన 2025 డిసెంబర్ సేల్స్ రిపోర్ట్ చూస్తుంటే, ఈ బైక్ తన సొంత కంపెనీలోని ఇతర మోడళ్లను కూడా వెనక్కి నెట్టి దూసుకుపోతోంది. తక్కువ ధరలో ఎక్కువ ఫీచర్లు, అదిరిపోయే లుక్ ఉండటంతో కుర్రాళ్ల నుంచి ముసలి వాళ్ల దాకా అందరూ దీనికే జై కొడుతున్నారు.

భారతదేశంలో మిడ్-సైజ్ మోటార్‌సైకిల్ సెగ్మెంట్ అనగానే అందరికీ గుర్తొచ్చే పేరు రాయల్ ఎన్‌ఫీల్డ్. అందులోనూ క్లాసిక్ 350 మోడల్ ఒక ఐకాన్. 2025 డిసెంబర్ నెలలో ఈ బైక్ ఏకంగా 34,958 యూనిట్ల అమ్మకాలను నమోదు చేసింది.

గత ఏడాది (2024 డిసెంబర్) ఇదే సమయంలో అమ్ముడైన 29,637 యూనిట్లతో పోలిస్తే, ఇది 17.95 శాతం వృద్ధిని సూచిస్తోంది. అంటే కేవలం ఒక్క నెలలోనే అదనంగా 5,321 బైకులు అమ్ముడయ్యాయి. ఈ ఘనతతో దేశంలోనే అత్యధికంగా అమ్ముడవుతున్న టాప్ 10 మోటార్‌సైకిళ్ల జాబితాలో క్లాసిక్ 350 ఆరో స్థానాన్ని కైవసం చేసుకుంది.

ఈ జాబితాలో మొదటి ఐదు స్థానాల్లో హీరో స్ప్లెండర్, హోండా షైన్, బజాజ్ పల్సర్, హీరో హెచ్‌ఎఫ్ డీలక్స్, టీవీఎస్ అపాచీ వంటి తక్కువ ధర కలిగిన బైకులు ఉన్నాయి. ఒక 350సీసీ ప్రీమియం బైక్ అయి ఉండి కూడా వీటితో పోటీ పడి 6వ స్థానంలో నిలవడం క్లాసిక్ 350 రేంజ్ ఏంటో తెలియజేస్తోంది. హోండా హైనెస్ CB350 వంటి గట్టి పోటీదారులు ఉన్నప్పటికీ, రాయల్ ఎన్‌ఫీల్డ్ బ్రాండ్ వాల్యూ ముందు అవి నిలవలేకపోతున్నాయి.

రాయల్ ఎన్‌ఫీల్డ్ క్లాసిక్ 350 వివిధ కలర్ ఆప్షన్లలో లభిస్తుంది. దీని ప్రారంభ ధర (రెడ్ విచ్ రెడ్ కలర్) రూ.1,82,658 గా ఉంది. ఇక టాప్ ఎండ్ మోడల్ అయిన ఎమరాల్డ్ కలర్ ధర రూ. 2,17,585 వరకు ఉంటుంది. మధ్యలో హాల్సియాన్ బ్లాక్ (రూ. 1.85 లక్షలు), జోధ్‌పూర్ బ్లూ (రూ. 1.88 లక్షలు), మెడాలియన్ బ్రోన్జ్ (రూ. 1.92 లక్షలు) వంటి ఆప్షన్లు అందుబాటులో ఉన్నాయి. స్టీల్త్ బ్లాక్, గన్ గ్రే వంటి రాయల్ కలర్స్ రూ. 2.12 లక్షల ధరతో వస్తున్నాయి.

ఈ బైక్‌లో 349 సీసీ సింగిల్ సిలిండర్, ఎయిర్-ఆయిల్ కూల్డ్ ఇంజన్‌ను అమర్చారు. ఇది 20.21 PS పవర్, 27 Nm టార్క్‌ను ఉత్పత్తి చేస్తుంది. దీని వల్ల లాంగ్ రైడ్లలో కూడా ఇంజన్ చాలా స్మూత్‌గా ఉంటుంది. ఇందులో 5-స్పీడ్ గేర్ బాక్స్ ఉంది. మైలేజ్ విషయానికి వస్తే, లీటరుకు సుమారు 41.55 కిలోమీటర్ల మైలేజీని ఇస్తుందని కంపెనీ పేర్కొంది. 13 లీటర్ల ఫ్యూయల్ ట్యాంక్ కెపాసిటీతో వచ్చే ఈ బైక్, సుదూర ప్రయాణాలకు పక్కాగా సరిపోతుంది.

పాత క్లాసిక్ బైకులకు భిన్నంగా, కొత్త మోడల్‌లో అనలాగ్, డిజిటల్ మిశ్రమంతో కూడిన ఇన్‌స్ట్రుమెంట్ కన్సోల్‌ను అందించారు. ఇందులో బ్లూటూత్ కనెక్టివిటీ, ట్రిప్పర్ నావిగేషన్ వంటి స్మార్ట్ ఫీచర్లు ఉన్నాయి. సింగిల్ ఛానల్, డ్యూయల్ ఛానల్ ఏబీఎస్ (ABS) ఆప్షన్లు కూడా ఉండటంతో సేఫ్టీ పరంగా కూడా ఇది బెస్ట్ అనిపించుకుంటోంది. రాయల్ ఎన్‌ఫీల్డ్ హంటర్ 350 తక్కువ ధరలో ఉన్నప్పటికీ, క్లాసిక్ లుక్ కోసం జనాలు కొంచెం ఎక్కువ ఖర్చు చేసి క్లాసిక్ 350 వైపే మొగ్గు చూపుతున్నారు.

Credit: Drivespark