బంగారానికే షాక్ ఇస్తోన్న కారు ఇదే.. దీనికే డిమాండ్ ఎక్కువ! ఇతర దేశాల ప్రజలు ఇదంటే పడిచచ్చిపోతున్నారు!

నిస్సాన్ మాగ్నైట్ (Nissan Magnite) ఇప్పుడు కేవలం ఒక కాంపాక్ట్ SUV మాత్రమే కాదు... భారత ఆటో పరిశ్రమ ఎగుమతుల మ్యాప్‌ను మార్చేస్తున్న పేరు. విదేశీ మార్కెట్లలో ఈ కారు సాధించిన విజయం చూసి, భారత మార్కెట్లో నంబర్ వన్ అమ్మకందారులైన మారుతి సుజుకి, హ్యుందాయ్ వంటి దిగ్గజ కంపెనీలు కూడా ఆశ్చర్యపోయే స్థాయికి నిస్సాన్ మాగ్నైట్ ఎదిగింది. డిసెంబర్ 2025 నెలకు సంబంధించిన కార్ల ఎగుమతి గణాంకాలు విడుదలైనప్పుడు, అందరి దృష్టి ఒక్కసారిగా నిస్సాన్ మాగ్నైట్ SUV పైనే నిలిచింది. ఎందుకంటే ఆ నెలలో భారతదేశం నుంచి అత్యధికంగా ఎగుమతి చేయబడిన వాహనంగా మాగ్నైట్ నిలిచింది. ఒక్క డిసెంబర్ 2025 లోనే మొత్తం 9,268 యూనిట్ల మాగ్నైట్ SUVలను విదేశీ మార్కెట్లకు నిస్సాన్ పంపింది.

ఇది సాధారణ సంఖ్య కాదు, ఒక చరిత్రాత్మక మైలురాయి. ఇదే విషయాన్ని గత ఏడాదితో పోల్చితే ఈ విజయం ఎంత పెద్దదో అర్థమవుతుంది. డిసెంబర్ 2024లో నిస్సాన్ మాగ్నైట్ ఎగుమతులు కేవలం 2,570 యూనిట్లకే పరిమితమయ్యాయి. కానీ ఏడాది గడిచేలోపే పరిస్థితి పూర్తిగా మారిపోయింది. డిసెంబర్ 2025 నాటికి అదనంగా 6,698 యూనిట్లు ఎక్కువగా ఎగుమతి అవ్వడంతో మాగ్నైట్ SUV ఏకంగా 260.62 శాతం సంవత్సరానికీ వృద్ధిని నమోదు చేసింది.

గత 12 నెలల కాలంలో ఎగుమతుల్లో కనిపించిన ఈ భారీ పెరుగుదల నిస్సాన్ కంపెనీకి ఒక పెద్ద విజయం మాత్రమే కాదు, భారతదేశంలో తయారైన కార్లు గ్లోబల్ మార్కెట్లలో ఎంతటి ఆదరణ పొందుతున్నాయో చెప్పే స్పష్టమైన సంకేతం కూడా. ఆకర్షణీయమైన డిజైన్, పోటీ ధరలు, మంచి ఫీచర్లు, విశ్వసనీయమైన పనితీరు... ఈ అన్ని అంశాలు కలిసి నిస్సాన్ మాగ్నైట్‌ను విదేశీ వినియోగదారుల హృదయాల్లో ప్రత్యేక స్థానం సంపాదించుకునేలా చేశాయి.

భారత మార్కెట్లో అమ్మకాల్లో గట్టి పోటీ ఎదురైనా, ఎగుమతుల విషయంలో మాత్రం నిస్సాన్ మాగ్నైట్ తన సత్తా చాటుతోంది. ముఖ్యంగా చిన్న SUVలకి ప్రపంచవ్యాప్తంగా పెరుగుతున్న డిమాండ్‌ను సరిగ్గా ఉపయోగించుకొని, "మెడ్ ఇన్ ఇండియా" మాగ్నైట్‌ను నిస్సాన్ గ్లోబల్ హిట్‌గా మార్చింది. కేవలం రూ. 5.62 లక్షల ప్రారంభ ఎక్స్-షోరూమ్ ధరతో లభిస్తున్న కారు రాబోయే రోజుల్లో ఎగుమతుల పరంగా ఇంకా కొత్త రికార్డులు సృష్టించే అవకాశాలు స్పష్టంగా కనిపిస్తున్నాయి.

ఎగుమతుల జాబితాలో రెండవ స్థానంలో హ్యుందాయ్ వెర్నా నిలిచింది. డిసెంబర్ 2025లో భారతదేశం నుంచి 6,125 యూనిట్ల వెర్నా సెడాన్‌లు విదేశాలకు వెళ్లాయి. గత ఏడాది 4,054 యూనిట్లతో పోలిస్తే 2,071 యూనిట్లు ఎక్కువగా ఎగుమతి కావడంతో, ఈ మిడ్-సైజ్ సెడాన్ 51.09 శాతం వార్షిక వృద్ధిని నమోదు చేసింది. మూడవ స్థానాన్ని టయోటా హై-రైడర్ కాంపాక్ట్ SUV దక్కించుకుంది. డిసెంబర్ 2025లో టయోటా 5,164 యూనిట్లను ఎగుమతి చేసింది.

ఇది గత సంవత్సరం 4,642 యూనిట్లతో పోలిస్తే 522 యూనిట్లు ఎక్కువ. నాల్గవ స్థానంలో మారుతి సుజుకి జిమ్నీ 4,592 యూనిట్లతో నిలిచింది, అయితే ఇది 2.28 శాతం తగ్గుదల చూశింది. ఐదవ స్థానం హ్యుందాయ్ గ్రాండ్ ఐ10 నియోస్‌కు దక్కింది. ఆరవ స్థానంలో నిస్సాన్ సన్నీ డిసెంబర్ 2025లో మొత్తం 4,202 యూనిట్లను విదేశీ మార్కెట్లకు ఎగుమతి చేసి, సెడాన్ విభాగంలో తన స్థిరమైన డిమాండ్‌ను మరోసారి నిరూపించింది.

ఏడవ స్థానంలో మారుతి సుజుకి డిజైర్ 3,489 యూనిట్లతో మంచి ప్రదర్శన చూపింది. హ్యుందాయ్ ఆరా కూడా ఈ జాబితాలో 3,261 యూనిట్ల ఎగుమతులతో ఎనిమిదవ స్థానాన్ని దక్కించుకున్న ఇది ఫీచర్ల పరంగా అంతర్జాతీయ మార్కెట్ల అవసరాలకు సరిపోయే మోడల్‌గా నిలుస్తోంది. ఇక మారుతి సుజుకి తొలి ఎలక్ట్రిక్ SUV అయిన e-Vitara ప్రత్యేక ఆకర్షణగా మారింది. డిసెంబర్ 2025లో 2,724 యూనిట్లను ఎగుమతి చేసి తొమ్మిదవ స్థానంలో నిలిచింది.

Credit: Drivespark