పేదవాడి కారుకు క్రాష్ టెస్ట్ చేస్తే అసలు నిజం బయటపడింది.. నిజంగా ఎంత సేఫ్?

భారత మార్కెట్లో నమ్మకమైన, మైలేజ్‌కు పేరున్న హ్యాచ్‌బ్యాక్‌లలో మారుతి సుజుకి సెలెరియో (Maruti suzuki Celerio)కి ప్రత్యేక స్థానం ఉంది. తక్కువ ధర, మంచి ఫ్యూయల్ ఎఫిషియెన్సీ, నగర ప్రయాణాలకు అనుకూలమైన డిజైన్ కారణంగా ఇది ఎన్నో కుటుంబాల తొలి కారుగా మారింది. అయితే తాజాగా గ్లోబల్ NCAP నిర్వహించిన క్రాష్ టెస్ట్ ఫలితాల్లో 3 స్టార్ రేటింగ్ పొందింది. దీంతో సెలెరియో భద్రతపై కొత్త చర్చ మొదలైంది. ఈ క్రాష్ టెస్ట్ ఫలితాల ప్రకారం, మారుతి సుజుకి సెలెరియో వయోజన ప్రయాణీకుల రక్షణలో మధ్యస్థ స్థాయి పనితీరును చూపించింది. ముందు సీట్లలో కూర్చున్న డ్రైవర్, సహ ప్రయాణీకులకు ప్రమాద సమయంలో సరైన స్థాయిలో రక్షణ లభిస్తుందని పరీక్షలు సూచించాయి. ముఖ్యంగా ఛాతీ, తల రక్షణలో కార్ సరాసరి స్థాయిలో స్కోర్ సాధించినప్పటికీ, కొన్ని భాగాల్లో మెరుగుదల అవసరం ఉన్నట్టు నిపుణులు అభిప్రాయపడుతున్నారు.

అయినప్పటికీ, ఈ ఫలితాల ఆధారంగా సెలెరియోకు వయోజన భద్రతలో 3-స్టార్ రేటింగ్ లభించడం గమనార్హం. అయితే పిల్లల భద్రత విషయంలో సెలెరియో కొంత వెనుకబడినట్టు కనిపిస్తుంది. రియర్ సీట్లో పిల్లల కోసం ఉపయోగించే చైల్డ్ సీట్స్ అమరిక, ప్రమాద సమయంలో వాటి స్థిరత్వం వంటి అంశాల్లో ఇది పరిమిత స్థాయి రక్షణనే అందించగలదని పరీక్షలు స్పష్టం చేశాయి. అందువల్ల పిల్లల భద్రతలో ఈ కారుకు 2-స్టార్ రేటింగ్ మాత్రమే లభించింది.

కుటుంబంతో కలిసి ప్రయాణించే వినియోగదారులు ఈ అంశాన్ని తప్పనిసరిగా పరిగణనలోకి తీసుకోవాల్సిన అవసరం ఉంది. అయితే ఇక్కడ ఒక ముఖ్యమైన విషయం స్పష్టంగా చెప్పుకోవాలి. మారుతి సుజుకి సెలెరియో భద్రత విషయంలో ఇప్పుడు గతంతో పోలిస్తే నిజంగానే మెరుగుపడింది. తాజాగా గ్లోబల్ NCAP పరీక్షలకు గురైన సెలెరియో, ఇది పాత మోడల్ కాదు... ప్రస్తుతం మార్కెట్లో విక్రయిస్తున్న అప్డేటెడ్ వెర్షన్. ఇందులోనే అసలు మార్పు కనిపిస్తుంది.

ముందుగా సెలెరియోలో కేవలం 2 ఎయిర్‌బ్యాగ్‌లు మాత్రమే అందుబాటులో ఉండేవి. ఆ పాత వెర్షన్‌ను గ్లోబల్ NCAP క్రాష్ టెస్టింగ్ చేసినప్పుడు, పెద్దల భద్రతలో కేవలం 2-స్టార్ రేటింగ్, పిల్లల భద్రతలో అయితే 1-స్టార్ మాత్రమే వచ్చింది. కానీ ఇప్పుడు పరిస్థితి పూర్తిగా మారింది. మారుతి సుజుకి తాజాగా సెలెరియోను భద్రత పరంగా అప్‌డేట్ చేసింది. ప్రస్తుతం అందుబాటులో ఉన్న అన్ని వేరియంట్‌లు 6 ఎయిర్‌బ్యాగ్‌లతో వస్తున్నాయి.

ఈ మెరుగైన భద్రతా పరికరాలతో కూడిన కొత్త సెలెరియోను గ్లోబల్ NCAP మళ్లీ క్రాష్ టెస్టింగ్‌కు గురిచేసింది. ఫలితంగా, వయోజన ప్రయాణీకుల రక్షణ రేటింగ్ 2 స్టార్‌ల నుంచి 3 స్టార్‌లకు పెరిగింది. అలాగే పిల్లల భద్రత రేటింగ్ కూడా 1 స్టార్ నుంచి 2 స్టార్‌లకు మెరుగుపడింది. ఇది చిన్న విషయం కాదు, ఎందుకంటే తక్కువ ధర హ్యాచ్‌బ్యాక్ సెగ్మెంట్‌లో ఇలాంటి భద్రతా అప్‌డేట్స్ చాలా అరుదుగా కనిపిస్తాయి.

మొత్తంగా చూస్తే, మారుతి సుజుకి సెలెరియో భద్రత పరంగా సాధారణం అనే వర్గంలో నిలుస్తోంది. రోజువారీ నగర వినియోగం, తక్కువ వేగాలతో జరిగే ప్రయాణాలకు ఇది సరిపోతుంది కానీ, అత్యాధునిక భద్రతా ఫీచర్లు లేదా అత్యుత్తమ క్రాష్ రక్షణ కోరుకునే వారికి ఇది పూర్తిగా తృప్తినిచ్చే స్థాయిలో ఉండకపోవచ్చు. అయినప్పటికీ, ధర, మైలేజ్, మెయింటెనెన్స్ వంటి అంశాల్లో సెలెరియో ఇప్పటికీ బలమైన ఎంపికగానే కొనసాగుతోంది.

ప్రస్తుతం సెలెరియో ప్రారంభ ధర కేవలం రూ. 4.70 లక్షలు మాత్రమే ఉండటం వల్ల, తొలి కారు కొనాలనుకునే వినియోగదారులు, బడ్జెట్‌పై దృష్టి పెట్టే కుటుంబాలకు ఇది చాలా ఆకర్షణీయంగా మారింది. మైలేజ్ విషయంలో కూడా సెలెరియో తన క్లాస్‌లో ముందంజలోనే ఉంది. ముఖ్యంగా CNG వేరియంట్లను పరిశీలిస్తే, మారుతి సుజుకి తెలిపిన ARAI గణాంకాల ప్రకారం ఇవి గరిష్టంగా 34.43 కి.మీ/కిలో మైలేజీని అందించగలవు.

Credit: Drivespark