యస్ బ్యాంకు కస్టమర్లకు శుభవార్త, బ్యాంక్ కార్యకలాపాల పునరుద్ధరణ

యస్ బ్యాంకు కస్టమర్లకు శుభవార్త. తీవ్ర ఆర్థిక సంక్షోభంలో ఉన్న ఈ బ్యాంకుపై రిజర్వ్ బ్యాంక్ ఆఫ్ ఇండియా (RBI) పదిహేను రోజుల క్రితం మారటోరియం విధించిన విషయం తెలిసిందే. ఈ రోజు (మార్చి 18) సాయంత్రం దీనిని ఎత్తివేసింది. పరిమిత నగదు ఉపసంహరణ, బ్యాంకింగ్ సేవలు లేకుండా ఇప్పటి వరకు కస్టమర్లు ఇబ్బందులు పడ్డారు. మారటోరియం ఎత్తివేయడం కష్టమర్లకు శుభవార్తే.

యస్ బ్యాంకు ఈ రోజు నుండి బ్యాంకింగ్ సేవలను పునరుద్ధరించింది. దేశవ్యాప్తంగా ఉన్న 1,132 యస్ బ్యాంకు బ్రాంచీలు ఇప్పుడు తమ కస్టమర్ల కోసం తిరిగి ప్రారంభమయ్యాయి. మార్చి 5న యస్ బ్యాంకుపై ఆర్బీఐ మారటోరియం విధించిన విషయం తెలిసిందే. ఏప్రిల్ 3వ తేదీ వరకు కస్టమర్లు రూ.50 వేల విత్ డ్రా పరిమితిని విధించింది. సంక్షోభంలో ఉన్న యస్ బ్యాంకు బోర్డును కూడా ఆర్బీఐ రద్దు చేసి, అడ్మినిస్ట్రేటర్‌గా ప్రశాంత్ కుమార్‌ను నియమించింది.

బుధవారం సాయంత్రం ఆరు గంటలకు మారటోరియం ఎత్తివేసిన నేపథ్యంలో బ్యాంకింగ్ సర్వీసులు పూర్తిగా తిరిగి ప్రారంభమయ్యాయి. ఈ సందర్భంగా యస్ బ్యాంకు ట్వీట్ చేసింది. మారటోరియం సాయంత్రం ఆరు గంటలకు ఎత్తివేశారని, సర్వీసులు పునరుద్ధరించామని, కస్టమర్లకు పూర్తిస్థాయిలో సేవలు అందుబాటులోకి వస్తాయని, మీ సహనానికి, సహకారానికి థ్యాంక్స్ అంటూ కస్టమర్లను ఉద్దేశించి పేర్కొంది.