భారత్‌లో భారీగా తగ్గిన బంగారం ధరలు, అక్కడ మళ్లీ 1,900 డాలర్లకు..

భారీగా తగ్గిన ధరలు...

పసిడి ధరలు ఈ రోజు రూ.400కు పైగా తగ్గి రూ.50,249కి చేరుకుంటే, వెండి ధరలు కూడా తగ్గుముఖం పట్టాయి. ఎంసీఎక్స్‌లో సిల్వర్ ఫ్యూచర్స్ 2.8 శాతం లేదా రూ.1,700కు పైగా క్షీణించి కిలో రూ.60,700 పలికింది. అంతకుముందు సెషన్‌లో పసిడి రూ.500 పెరిగింది. వెండి కిలో రూ.1,900 వరకు ఎగిసింది.

అంతర్జాతీయ మార్కెట్లోను పసిడి ధరలు అస్థిరంగా ఉన్నాయి. స్పాట్ గోల్డ్ 0.1 శాతం క్షీణించి ఔన్స్ 1,896.03 డాలర్లు పలికింది. సిల్వర్ మాత్రం 0.2 శాతం ఎగిసి ఔన్స్ 24.22 డాలర్లు పలికింది. ప్లాటినమ్ ధర 0. శాతం క్షీణించి 883.25 డాలర్లు, పల్లాడియం 0.5 శాతం లాభపడి 2,319.59 డాలర్లు పలికింది.

ఫ్యూచర్ మార్కెట్లో..

బుధవారం ప్రారంభంలో పసిడి ధర ఔన్స్ భారీగా పడిపోయింది. ఓ సమయంలో కొనుగోలుదారులు రంగంలోకి దిగడంతో 1900 డాలర్లకు కూడా పెరిగింది. అయితే డాలర్ వ్యాల్యూ మళ్లీ కోలుకునే పరిస్థితి ఉందని, అప్పుడు పసిడి ధర మరింతగా క్షీణించే అవకాశాలు కొట్టి పారేయలేమని అంటున్నారు. ప్రపంచ అతిపెద్ద ఆర్థిక వ్యవస్థ అమెరికాలో అధ్యక్ష బరిలో ఉన్న ఇద్దరి మధ్య డిబెట్ సందర్భంగా పసిడి ధరలు నిన్న పెరిగాయి.

నేడు అంతర్జాతీయ మార్కెట్లో పసిడి ట్రాయ్ ఔన్స్ మద్దతు ధర 1,884-1,874 డాలర్లుగా ఉంటుందని బులియన్ మార్కెట్ నిపుణులు అంచనా వేస్తున్నారు. నిరోధకస్థాయి 1,914-1,930 డాలర్లు.

అస్థిరంగానే

బులియన్ మార్కెట్లోను పసిడి ధరలు తగ్గుముఖం పట్టాయి. కరోనా కేసులు, వ్యాక్సీన్ అంశాలను పక్కన పెడితే, అమెరికా అధ్యక్ష ఎన్నికలు పూర్తయ్యే వరకు బంగారం ధరలు అస్థిరంగా ఉండే అవకాశాలు లేకపోలేదని అంటున్నారు. డాలర్ వ్యాల్యూ పెరిగితే పసిడి ధరలు తగ్గుతాయి. గత నెలలో అంతర్జాతీయ మార్కెట్లో పసిడి ధర ఔన్స్ 2,075 డాలర్లకు పైగా పెరిగింది. ఆ ధరలతో పోలిస్తే ఇప్పుడు 175 డాలర్ల వరకు తగ్గింది.