భారత్‌తో సహా 10 దేశాలను సుంకాలతో టార్గెట్ చేసిన అమెరికా..ట్రంప్ టార్గెట్‌ వెనుక అసలు కారణాలివే..

అమెరికా అధ్యక్షుడు డొనాల్డ్ Trump అనుసరిస్తున్న వాణిజ్య విధానం గ్లోబల్ ఎకానమీ రూపురేఖలను సమూలంగా మార్చివేస్తోంది. సుంకాలను (Tariffs) కేవలం దిగుమతులు, ఎగుమతులు, వాణిజ్య లోటును తగ్గించేందుకు మాత్రమే కాకుండా.. అంతర్జాతీయ విదేశాంగ విధానంలో ఇతర దేశాలను లొంగదీసుకునే ప్రధాన ఆయుధంగా అమెరికా ఉపయోగిస్తోంది.

రష్యా చమురు కొనుగోళ్లు, అక్రమ వలసలు, మాదకద్రవ్యాల స్మగ్లింగ్, ఫెంటానిల్ నియంత్రణ, అణు కార్యక్రమాలు, జాతీయ భద్రత వంటి కీలక భౌగోళిక రాజకీయ సమస్యలపై వివిధ దేశాలపై ఒత్తిడి తెచ్చేందుకు వాషింగ్టన్ సుంకాలు, ఆంక్షలను యథేచ్ఛగా ప్రయోగిస్తోంది. దీనివల్ల భారత్, చైనా, కెనడాతో పాటు యూరప్ దేశాల సరఫరా గొలుసు తీవ్ర అనిశ్చితిలో పడింది.

భారతదేశం విషయానికి వస్తే.. రష్యా నుండి క్రూడ్ ఆయిల్ కొనుగోలు చేయడమే ప్రధాన లక్ష్యంగా అమెరికా కఠిన వైఖరి అవలంబిస్తోంది. భారత ఉత్పత్తులపై మొదట 25 శాతం పరస్పర సుంకాన్ని.. ఆ తర్వాత అదనంగా మరో 25 శాతం డ్యూటీని విధిస్తూ నిర్ణయం తీసుకుంది. దీనికి తోడు బలవంతపు కార్మికులతో తయారు చేసిన వస్తువుల దిగుమతుల నిరోధం (Section 301) కింద మరో 10 శాతం సుంకం భారాన్ని భారత్ ఎదుర్కొంటోంది. కాగా ఈ ప్రతిష్టంభనను తొలగించేందుకు ఇరు దేశాల మధ్య దౌత్యపరమైన వాణిజ్య చర్చలు కొనసాగుతున్నాయి.

ఇటు చైనాతో కూడా అమెరికా వివాదం తీవ్ర రూపం దాల్చింది. మారణాయుధంగా మారిన ఫెంటానిల్ రసాయనాల అక్రమ సరఫరాను అరికట్టడంలో బీజింగ్ విఫలమైందనే ఆరోపణలతో చైనా ఉత్పత్తులపై అదనపు పన్నులు పడ్డాయి. దీనికి ప్రతిగా చైనా కూడా అమెరికా వస్తువులపై ప్రతికార సుంకాలు విధించడమే కాకుండా.. సెమీకండక్టర్ల తయారీకి అవసరమయ్యే కీలక ఖనిజాల ఎగుమతిపై ఆంక్షలు విధించింది. కెనడాతో ఫెంటానిల్, సరిహద్దు అక్రమ వలసలు వివాదాస్పదంగా మారగా.. ఆటో రంగంతో సహా ఇరు దేశాల మధ్య ప్రతీకార సుంకాల యుద్ధం మొదలైంది. అయితే మెక్సికోపై ఒత్తిడి ఉన్నప్పటికీ.. యూఎస్ఎమ్‌సీఏ (USMCA) ఒప్పందం వల్ల దానికి కొంతవరకు మినహాయింపు లభించింది.

Also Read

అమెరికాలో ఉద్యోగం మరిచిపోండి.. H-1B వీసా ఫీజును మళ్లీ భారీగా పెంచిన ట్రంప్ సర్కారు..

రష్యా, ఇరాన్, వెనిజులా లాంటి దేశాలపై అమెరికా ఒత్తిడి మునుపటి కంటే సమగ్రంగా మారింది. రష్యా ఉక్రెయిన్ యుద్ధం నేపథ్యంలో రష్యా నుండి ఇంధనం కొనుగోలు చేసే మూడవ దేశాలపై కూడా ఆంక్షలు విధిస్తామని బెదిరిస్తుండగా.. ఇరాన్ అణు, క్షిపణి కార్యక్రమాలను లక్ష్యంగా చేసుకుని సరికొత్త నిబంధనలు తెచ్చింది. యూరోపియన్ యూనియన్ వస్తువులపై 15 శాతం సుంకం పరిమితి విధిస్తూనే.. రక్షణ వ్యయం, రష్యా విధానాలపై కొత్త విచారణలు చేపట్టింది. కొలంబియా, క్యూబా వంటి దేశాలు కూడా వలసదారులు, ఇంధన సంక్షోభ నిబంధనల కింద సుంకాల పరిధిలోకి వచ్చాయి.

వాణిజ్య నిబంధనలను విదేశాంగ విధాన సాధనంగా మార్చడం వల్ల అంతర్జాతీయ వ్యాపార నిర్వహణ అత్యంత సంక్లిష్టంగా మారింది. సుంకాల భయంతో ముడిపడిన ఈ ఆర్థిక వ్యూహం వల్ల ప్రపంచవ్యాప్తంగా పెట్టుబడుల ప్రవాహం నిలిచిపోయే ప్రమాదం ఉందని ఆర్థిక నిపుణులు ఆందోళన వ్యక్తం చేస్తున్నారు.