Q4 results: కార్పోరేట్ కంపెనీలకు సెబి భారీ ఊరట, మరింత గడువు

కరోనా మహమ్మారి సెకండ్ వేవ్ తీవ్రరూపం దాల్చుతున్న నేపథ్యంలో కంపెనీల ఫలితాల ప్రకటనపై స్టాక్ మార్కెట్ నియంత్రణ మండలి సెబీ కీలక నిర్ణయం తీసుకుంది. స్టాక్ మార్కెట్ లిస్టెడ్ కంపెనీలు గత ఆర్థిక సంవత్సరం చివరి త్రైమాసిక ఆర్థిక ఫలితాలను జూన్ మాసం చివరి వరకు ప్రకటించుకునే వెసులుబాటు కల్పించింది.

కరోనా సెకండ్ వేవ్ నేపథ్యంలో కార్పొరేట్ సంస్థల విజ్ఞప్తి మేరకు సెబీ ఈ నిర్ణయం తీసుకున్నది. గత ఆర్థిక సంవత్సరం, అలాగే చివరి త్రైమాసికం ముగిసిన 45 రోజుల్లో కార్పొరేట్ సంస్థలు తమ ఆర్థిక ఫలితాల్ని ప్రకటించాలి. సెబీ తాజా నిర్ణయం నేపథ్యంలో జూన్ చివరి వరకు ఫలితాలు ప్రకటించుకునే అవకాశం దక్కింది.

ఇదిలా ఉండగా మ్యూచువల్ ఫండ్స్ (MF)కు సంబంధించి సెబీ కొత్త నిర్ఱయం తీసుకున్నది. ఆయా పథకాల పెట్టుబడులు, వాటి పనితీరు, నష్ట భయం వివరాలను MFలు ఇన్వెస్టర్లకు ఎప్పటికపుడు ఈ-మెయిల్స్ ద్వారా వెల్లడించాలి. పనితీరుకు సంబంధించిన వివరాలు ఆయా బెంచ్‌మార్క్‌ల ప్రకారమే ఉండాలని పేర్కొంది. ఈ సంవత్సరం జూన్ 1వ తేదీ నుండి ఈ నిబంధనలు అమల్లోకి వస్తున్నాయి.