జీరో బ్యాలెన్స్ ఖాతాల్లో ట్రాన్సాక్షన్స్ ఛార్జీలపై ఎస్బీఐ వడ్డీ రేటు, ఫ్రీ ట్రాన్సాక్షన్స్

జీరో బ్యాలెన్స్ ఖాతాల్లో 4 కంటే అత్యధికంగా జరిపిన ట్రాన్సాక్షన్స్ పైన విధించిన ఛార్జీలను రీఫండ్ చేశామని దేశంలోని అతిపెద్ద ప్రభుత్వ రంగ వాణిజ్య బ్యాంకు భారతీయ స్టేట్ బ్యాంక్(SBI) తెలిపింది. పరిమితికి మించిన ట్రాన్సాక్షన్స్ పైన సహేతుక ఛార్జీలు వసూలు చేసుకునే వెసులుబాటును 2012 ఆగస్ట్ నెలలో ఆర్బీఐ కల్పించినట్లు గుర్తు చేసింది. కాబట్టి బేసిక్ సేవింగ్స్ బ్యాంకు డిపాజిట్ (BSBD) ఖాతాదారులు నెలలో నాలుగు ఉచిత ట్రాన్సాక్షన్స్ తర్వాత జరిపే ట్రాన్సాక్షన్స్‌పై ఛార్జీలు వసూలు చేసినట్లు తెలిపింది.

2016 జూన్ 15వ తేదీ నుండి ఈ ఛార్జీలను వసూలు ప్రక్రియ అమలు చేసినట్లు తెలిపింది ఎస్బీఐ. జీరో బ్యాలెన్స్ ఖాతాలతో ఉచిత ట్రాన్సాక్షన్స్ పైన ఛార్జీలను వసూలు చేసే విషయాన్ని బ్యాంకు ఖాతాదారులకు ముందు సమాచారం ఇచ్చామని ఎస్బీఐ తెలిపింది. 2020 జనవరి 1వ తేదీ తర్వాత డిజిటల్ ట్రాన్సాక్షన్స్ పైన విధించిన ఛార్జీలను తిరిగి ఖాతాదారులకు చెల్లించాలని 2020 ఆగస్ట్ నెలలో సీబీడీటీ ఆదేశాలు జారీ చేసింది.

భవిష్యత్తులో బ్యాంకుల ఖాతాదారులు జ‌రిపే డిజిటల్ ట్రాన్సాక్షన్స్ పైన ఛార్జీలు ఛార్జీలు విధించరాదని త‌మ‌కు సీబీడీటీ సూచించిందని తెలిపింది.సీబీడీటీ ఇచ్చిన ఆదేశాల మేరకు 2020 జనవరి 1వ తేదీ నుండి 2020 సెప్టెంబర్ 14వ తేదీ వరకు జీరో బ్యాలెన్స్ ఖాతాదారుల డిజిటల్ ట్రాన్సాక్షన్స్ పైన విధించిన ఛార్జీలను రిఫండ్ చేశామని తెలిపింది. గత ఏడాది సెప్టెంబర్ 15 నుండి అలాంటి ఛార్జీలు వసూలు చేయడం లేదని తెలిపింది.