రష్యా సంస్థలతో ట్రాన్సాక్షన్స్ నిలిపివేసిన ఎస్బీఐ

ఉక్రెయిన్ పైన యుద్ధం నేపథ్యంలో అమెరికా, యూరోపియన్ దేశాలు రష్యా పైన కఠిన ఆంక్షలు విధిస్తున్నాయి. ఇప్పటికే స్విఫ్ట్ నుండి ఆ దేశాన్ని కత్తిరించాయి. కరెన్సీ ట్రాన్సాక్షన్స్ ఇబ్బందికరంగా మారాయి. రష్యా పైన కఠిన ఆంక్షల నేపథ్యంలో చమురు ధరలు, సురక్షిత పెట్టుబడిగా భావించే బంగారం ధరలు భారీగా పెరుగుతున్నాయి. అదే సమయంలో మార్కెట్ కుప్పకూలుతోంది. గతవారం మార్కెట్లు దారుణంగా పతనమయ్యాయి. ఇప్పుడు కూడా పతనమవుతున్నాయి. అయితే రష్యాపై ఆంక్షలు మాత్రం క్రమంగా పెరుగుతున్నాయి. ఇటీవల భారత ప్రభుత్వరంగ దిగ్గజం ఎస్బీఐ కూడా షాకింగ్ నిర్ణయం తీసుకున్నది.

ఉక్రెయిన్ పైన దాడి చేస్తున్న రష్యాపై అంతర్జాతీయ సమాజం ఆర్థిక ఆంక్షలతో కట్టడి చేసే ప్రయత్నాలు చేస్తోంది. ఇందులో భాగంగా ఆర్థిక ఆంక్షలకు గురైన సంస్థలతో నిర్వహించే ట్రాన్సాక్షన్స్‌ను ప్రాసెస్ చేయబోమని ఎస్బీఐ తన కస్టమర్లకు సమాచారాన్ని అందించిందని తెలుస్తోంది. రష్యా సంస్థల్లో ఉన్న పెట్టుబడుల వివరాల గురించి తెలియజేయాలని దేశీయ చమురు కంపెనీలతో పాటు ఎరువుల సంస్థలను ఎస్బీఐ కోరింది. అమెరికాతో పాటు యూరోపియన్ యూనియన్, ఐక్య రాజ్య సమితి ఆంక్షల నేపథ్యంలో బ్యాంకులు, నౌకాశ్రయాలు, ఓడల కంపెనీలతో నిర్వహించే ట్రాన్సాక్షన్స్ ప్రాసెస్ నిలిపివేసినట్లు తెలిపింది.

అంతర్జాతీయంగా విస్తరించి ఉన్నామని, కాబట్టి అమెరికా ఈయూ నిబంధనల మేరకు పని చేయాల్సి ఉందని, వాటిని పాటించకుండా ఉండలేమని బ్యాంకు అధికారి వెల్లడించారు. ఇదిలా ఉండగా, తమకు మరింత ముడిచమురు సరఫరా చేయాల్సిందిగా గల్ఫ్ దేశాలను భారత్ పెట్రోలియం కార్పోరేషన్ లిమిటెడ్ అడుగుతోందని తెలుస్తోంది.