ఎస్బీఐ నుంచి కీలక అప్‌డేట్: ఆ ఆన్‌లైన్ సిస్టమ్ షట్‌డౌన్..కొన్ని గంటల పాటు

ముంబై: స్టేట్ బ్యాంక్ ఆఫ్ ఇండియా కీలక అప్‌డేట్ వెలువడించింది. ఆన్‌లైన్ సేవలకు సంబంధించిన అప్‌డేట్ అది. ఎస్బీఐ ఖాతాదారుల కోసం అందుబాటులోకి తీసుకొచ్చిన ఆన్‌లైన్ కంప్లైంట్స్ విభాగం కొన్ని గంటల పాటు స్తంభించిపోనుంది. దీనితోపాటు ఆన్‌లైన్ రిక్వెస్టులు కూడా పనిచేయబోవు. ఏడు గంటల పాటు ఈ ఆన్‌లైన్ కంప్లైంట్స్, రిక్వెస్టుల విభాగం నిలిచిపోనుంది. ఈ రాత్రి 7 గంటల నుంచి ఆదివారం తెల్లవారు జామున 6 గంటల వరకు ఆ సెగ్మెంట్స్‌కు సంబంధించిన సేవలు ఏవీ అందుబాటులో ఉండవు.

మెయింటెనెన్స్ కోసం స్టేట్ బ్యాంక్ ఆఫ్ ఇండియా ఈ ఆన్‌లైన్ కంప్లైంట్స్ సెల్‌ను స్తంభింపజేయనుంది. మరింత మెరుగైన సేవలను తమ ఖాతాదారులకు అందించడంలో భాగంగా ఈ నిర్ణయాన్ని తీసుకున్నట్లు తెలిపింది. ఏడు గంటలపాటు ఆన్‌లైన్ కంప్లైంట్స్, రిక్వెస్టుల సేవలను షట్‌డౌన్ చేయనున్నట్లు స్పష్టం చేసింది. ఈ షట్‌డౌన్ సమయంలో ఖాతాదారులు ఇబ్బందులకు గురి కాకుండా ఉండటానికి ప్రత్యామ్నాయ మార్గాలను అందుబాటులోకి తీసుకొచ్చినట్లు వివరించింది.

ఈ డౌన్‌టైమ్‌లో ఖాతాదారులు తమ ఫిర్యాదులను స్టేట్ బ్యాంక్ ఆఫ్ ఇండియా యాజమాన్యం దృష్టికి తీసుకుని వెళ్లడానికి ఆయా ప్రత్యామ్నాయ మార్గాలను అనుసరించుకోవచ్చు. 24 గంటల పాటు అందుబాటులో ఉండే ఎస్బీఐ కాల్ సెంటర్‌కు ఫోన్ చేయవచ్చు. అనధికారిక ట్రాన్సాక్షన్స్ వంటి ఇతర కంప్లైంట్లపై ఫిర్యాదు చేయడానికి ఎస్బీఐ టోల్‌ఫ్రీ నంబర్లు 1800112211/18001234/18002100లకు ఫోన్ చేయవచ్చు.