ఆ విమానయాన సంస్థలో 3,000 ఉద్యోగాల కోత, చీఫ్ ఎగ్జిక్యూటివ్‌కు ఏడాది పాటు శాలరీ కోత

ప్రముఖ విమానయాన సంస్థ ర్యానెయర్ 3,000 ఉద్యోగాలను తొలగించేందుకు సిద్ధమైంది. కరోనా మహమ్మారి కారణంగా ప్రపంచవ్యాప్తంగా అన్ని విమానాలు గ్రౌండ్‌కు పరిమితమయ్యాయి. దీంతో ఐరోపాలో పలు కేంద్రాలను క్లోజ్ చేసినట్లు ప్రకటించింది. ఇందులో భాగంగా వేతనం లేని సెలవులు, 20 శాతం వరకు ఉద్యోగాల కోతలు ఉన్నట్లు తెలిపింది.

ఏప్రిల్ నుండి జూన్ మధ్య 1 శాతం కంటే తక్కువ విమానాలను నడపనున్నట్లు తెలిపింది. దాదాపు జూలై వరకు విమానాలు గ్రౌండ్‌కే పరిమితమయ్యే అవకాశముందని అంచనా వేస్తోంది. మరో రెండేళ్ల పాటు అంటే 2022 వరకు ప్రయాణీకుల సంఖ్య పెరిగే అవకాశాలు తక్కువగా ఉందని అంచనా వేస్తోంది. వచ్చే 24 నెలల్లో అందుకోవాల్సిన విమానాల సంఖ్య విషయంలో బోయింగ్‌తో చర్చలు జరుపుతున్నట్లు కూడా ప్రకటించింది.

కంపెనీ చీఫ్ ఎగ్జిక్యూటివ్ మైఖేల్ ఓ లీరీ మార్చి 2021 వరకు అంటే ఏడాది పాటు వేతనాన్ని 50 శాతం మాత్రమే తీసుకోవాలని నిర్ణయించారు. పాసింజర్లు లేక ఈ సంస్థ విమానాలు 91 శాతం మైదానానికే పరిమితమయ్యాయి. కంపెనీ తొలగిస్తున్న 3,000 ఉద్యోగాల్లో పైలట్లు, క్యాబిన్ క్రూ కూడా ఉంది. ప్రయాణీకులు బుక్ చేసుకున్న £3.8 మిలియన్లు తిరిగివ్వాలని నిర్ణయించారు.