Click it and Unblock the Notifications
రష్యా నుంచి భారత్కు డైరెక్ట్ ట్రైన్.. కొత్త రైల్వే కారిడార్పై ప్రతిపాదన..రూట్ మ్యాప్ ఇదే..
సముద్ర రవాణా మార్గాల్లో రోజురోజుకూ పెరుగుతున్న భౌగోళిక రాజకీయ ప్రమాదాలను, అంతరాయాలను అధిగమించేందుకు రష్యా సంచలన ప్రత్యామ్నాయ ప్రతిపాదనను తెరపైకి తెచ్చింది. హిందూ మహాసముద్రానికి నేరుగా ప్రాప్యత సాధించడంతో పాటు భారతదేశానికి నేరుగా సరుకుల రవాణాను సులభతరం చేసేందుకు ఒక నూతన భూమార్గ రైల్వే కనెక్షన్ను ఏర్పాటు చేసే అవకాశాలను రష్యా పరిశీలిస్తోంది. రష్యా ఉప ప్రధాని మరాత్ ఖుస్నుల్లిన్ అంతర్జాతీయ వార్తా సంస్థ 'టాస్' (TASS) కు ఇచ్చిన ఇంటర్వ్యూలో ఈ విషయాలను వెల్లడించారు.
రష్యా నుండి ప్రారంభమయ్యే ఈ ప్రతిపాదిత రైల్వే నెట్వర్క్ తుర్క్మెనిస్తాన్, ఇరాన్, ఆఫ్ఘనిస్తాన్, పాకిస్తాన్ల మీదుగా సాగి హిందూ మహాసముద్రం, భారత భూభాగానికి అనుసంధానమయ్యే అవకాశాలను విశ్లేషిస్తున్నట్లు ఆయన తెలిపారు. ప్రపంచ ఇంధన రవాణాలో 25 శాతం చమురు, 20 శాతం ఎల్ఎన్జీ కి రవాణా మార్గంగా ఉన్న హార్ముజ్ జలసంధి, నల్ల సముద్రాన్ని కలిపే బోస్ఫరస్ జలసంధి వంటి సున్నితమైన సముద్ర మార్గాలపై ఆధారపడటాన్ని తగ్గించుకోవడమే ఈ ప్రతిపాదన యొక్క ముఖ్య ఉద్దేశంగా కనిపిస్తోంది.
భారత్తో వాణిజ్య పరమైన, వ్యూహాత్మక అనుసంధానాన్ని పెంపొందించే ఏ భూమార్గాన్నైనా అత్యంత ఆచరణాత్మకమైనదిగా పరిగణిస్తామని ఖుస్నుల్లిన్ స్పష్టం చేశారు. ఈ కారిడార్ సాకారమైతే, ప్రమాదకరమైన జలమార్గాలకు ప్రత్యామ్నాయంగా రష్యా-భారత్ల మధ్య వస్తువుల రవాణా వేగవంతం కావడమే కాకుండా రష్యా యొక్క రవాణా భద్రత గణనీయంగా పెరుగుతుంది. అంతేకాకుండా.. భవిష్యత్తులో ఈ మార్గం ద్వారా ఇరు దేశాల మధ్య పర్యాటక రంగ అభివృద్ధికి, ప్రయాణికుల రాకపోకలకు కూడా మార్గం సుగమం కావచ్చు.
అయితే ప్రణాళిక దశలోనే ఉన్న ఈ ప్రతిపాదన కార్యరూపం దాల్చడానికి విస్తృతమైన మౌలిక సదుపాయాల కల్పనతో పాటు బహుళ దేశాల మధ్య బలమైన రాజకీయ సమన్వయం అవసరమవుతుంది. ప్రస్తుతం రైలు మార్గాలు, టిక్కెట్ ధరలు లేదా ప్రారంభ తేదీల వంటి వివరాలు ఏవీ ఖరారు కాలేదని.. కేవలం సముద్ర రవాణా ముప్పు నుండి రక్షణ పొందే వ్యూహాత్మక అడుగుగా మాత్రమే దీనిని భావించాలని రష్యా తెలిపింది.ఇదిలా ఉంటే రష్యా-భారత్ ప్రత్యామ్నాయ కారిడార్లకు సంబంధించి ఇంటర్నేషనల్ నార్త్-సౌత్ ట్రాన్స్పోర్ట్ కారిడార్ (INSTC) ఇప్పటికే టెస్టింగ్ దశలో ఉంది.
ఇంటర్నేషనల్ నార్త్-సౌత్ ట్రాన్స్పోర్ట్ కారిడార్ (INSTC) అంటే ఏమిటి?
INSTC అనేది రష్యా, ఇరాన్, భారత్ల మధ్య సరుకుల రవాణాను వేగవంతం చేసేందుకు రూపుదిద్దుకున్న 7,200 కిలోమీటర్ల సుదీర్ఘ బహుళ-మోడల్ (మల్టీ-మోడల్) రవాణా నెట్వర్క్. ఇందులో నౌకలు, రైలు మార్గాలు, రోడ్డు మార్గాలు కలసి ఉంటాయి. INSTC ప్రాజెక్టు పూర్తిస్థాయిలో ఒకే నిరంతర మార్గంగా ఇంకా ప్రారంభం కాలేదు. ప్రస్తుతం ఈ కారిడార్ పాక్షికంగా (విడతల వారీగా) మాత్రమే నడుస్తోంది
భారత్లోని ముంబై నుండి ఇరాన్లోని బందర్ అబ్బాస్ / చాబహార్ ఓడరేవుల వరకు సముద్ర మార్గం.. అలాగే అక్కడ నుండి రష్యా వరకు రోడ్డు, కొన్ని రైలు మార్గాల ద్వారా ఇప్పటికే సరుకుల రవాణా (ట్రయల్ రన్స్) జరుగుతోంది. ఇరాన్లోని రష్త్ - ఆస్తారా (Rasht-Astara) మధ్య ఉన్న సుమారు 160 కిలోమీటర్ల రైల్వే లింక్ నిర్మాణం ఇంకా పూర్తి కాలేదు. ఈ లింక్ పూర్తయితేనే రైలు మార్గం ద్వారా రష్యాకు అంతరాయం లేని అనుసంధానం ఏర్పడుతుంది. ఈ రైల్వే మార్గాన్ని పూర్తి చేసి, కారిడార్ను పూర్తిస్థాయిలో అందుబాటులోకి తీసుకురావడానికి భారత్, రష్యా, ఇరాన్ దేశాలు ప్రయత్నాలను వేగవంతం చేస్తున్నాయి.
ఇంటర్నేషనల్ నార్త్-సౌత్ ట్రాన్స్పోర్ట్ కారిడార్ (INSTC) ముఖ్యాంశాలు..
రవాణా మార్గం: ఈ మార్గం భారతదేశంలోని ముంబై పోర్ట్ నుండి ప్రారంభమై, ఇరాన్లోని చాబహార్ / బందర్ అబ్బాస్ పోర్టులకు సముద్ర మార్గం ద్వారా చేరుకుంటుంది. అక్కడి నుండి ఇరాన్ మరియు కాస్పియన్ సముద్రం మీదుగా రష్యాలోని అస్ట్రాఖాన్, మోస్కో నగరం వరకు విస్తరించి ఉంటుంది.
సమయం, వ్యయం ఆదా: సంప్రదాయ సూయజ్ కాలువ మార్గంతో పోలిస్తే, INSTC ద్వారా సరుకుల రవాణా సమయం 40% (సుమారు 40 రోజుల నుండి 20-25 రోజులకు) తగ్గుతుంది. అలాగే రవాణా వ్యయం దాదాపు 30% వరకు ఆదా అవుతుంది.
చాబహార్ పోర్ట్ ప్రాముఖ్యత: ఇరాన్లోని చాబహార్ పోర్ట్ అభివృద్ధిలో భారత్ కీలక పాత్ర పోషిస్తోంది. ఇది పాకిస్తాన్తో సంబంధం లేకుండా ఇరాన్, ఆఫ్ఘనిస్తాన్, రష్యా మరియు మధ్య ఆసియా దేశాలకు రవాణా సదుపాయాన్ని అందిస్తుంది.
ప్రస్తుత పరిస్థితి: ఈ కారిడార్ ద్వారా ఇప్పటికే కొన్ని ప్రయోగాత్మక సరుకు రవాణాలు విజయవంతంగా పూర్తయ్యాయి. ప్రస్తుతం ఇరాన్లో మిగిలి ఉన్న కొన్ని రైల్వే లింక్ల (ఉదాహరణకు రష్త్-ఆస్తారా రైల్వే లైన్) నిర్మాణాన్ని వేగవంతం చేయడం ద్వారా పూర్తిస్థాయి సేవలను అందుబాటులోకి తెచ్చేందుకు రష్యా, ఇరాన్, భారత్ కృషి చేస్తున్నాయి.
Sign in with Google