శత్రు దేశాలకు భారీ షాక్..భారత్‌తో జత కట్టిన రష్యా..నేవిలోకి మూడు కొత్త జలాంతర్గాములు

శత్రుదేశాలను ఎదుర్కోవడానికి భారత్ తన నావికాదళ సామర్థ్యాలను ఎప్పటికప్పుడు పెంచుకుంటూ పోతోంది. నీటి అడుగున యుద్ధ సామర్థ్యాలను నావికాదళ బలాన్ని బలోపేతం చేయడంలో ప్రస్తుతం భారతదేశం కీలక దశలో ఉంది. ఇందులో భాగంగా రష్యా మరోసారి భారత్‌కు మద్దతుగా ముందుకు వచ్చింది. మూడు పూర్తిగా ఆధునీకరించబడిన కిలో-క్లాస్ డీజిల్-ఎలక్ట్రిక్ జలాంతర్గాములను భారతదేశానికి అందించేందుకు రష్యా ప్రతిపాదన చేసింది. ఈ ఒప్పందం విలువ ఒక బిలియన్ డాలర్ల వరకు ఉండవచ్చని రక్షణ వర్గాలు వెల్లడిస్తున్నాయి. భారత నావికాదళంలో తగ్గిపోతున్న జలాంతర్గాముల సంఖ్యను తాత్కాలికంగా అయినా సమర్థంగా భర్తీ చేయడమే ఈ ఒప్పందం ప్రధాన లక్ష్యంగా ఉంది.

డిసెంబర్ తొలి వారంలో Russia అధ్యక్షుడు వ్లాదిమిర్ పుతిన్ న్యూఢిల్లీ పర్యటన ముగిసిన వెంటనే ఈ ప్రతిపాదన వెలుగులోకి వచ్చింది. ఆ పర్యటనలో భాగంగా.. 2028 నాటికి భారతదేశానికి అణుశక్తితో నడిచే అకులా-క్లాస్ దాడి జలాంతర్గామిని లీజుకు ఇస్తామని పుతిన్ హామీ ఇచ్చారు. అయితే ఆ అణు జలాంతర్గామి అందుబాటులోకి వచ్చేలోపు భారత నావికాదళ అవసరాలను తీర్చేందుకు రష్యా ఈ సాంప్రదాయ ప్రత్యామ్నాయాన్ని ముందుకు తెచ్చింది.

ఈ ప్రతిపాదనలో భాగంగా.. రష్యన్ నావికాదళంలో మిగులుగా ఉన్న మూడు కిలో-క్లాస్ జలాంతర్గాములను పూర్తిగా అప్‌గ్రేడ్ చేసి భారత్‌కు అందించనున్నారు. విస్తృతమైన ఆధునీకరణ ప్రక్రియ ద్వారా ఈ నౌకల సేవా జీవితాన్ని మరో 20 సంవత్సరాల వరకు పొడిగించనున్నారు. ప్రతి జలాంతర్గామి అంచనా వ్యయం 300 మిలియన్ డాలర్ల కంటే తక్కువగా ఉండటం వల్ల, ఇది ఖర్చు పరంగా కూడా భారతదేశానికి అనుకూలమైన ఒప్పందంగా పరిగణించబడుతోంది. ముఖ్యంగా 2030ల మధ్య నాటికి నావికాదళం గణనీయమైన జలాంతర్గాముల కొరతను ఎదుర్కొనే అవకాశం ఉన్న నేపథ్యంలో, ఈ ప్యాకేజీ కీలకమైన మధ్యంతర పరిష్కారంగా భావించబడుతోంది.

ఈ జలాంతర్గాములను ఆధునిక యుద్ధ అవసరాలకు అనుగుణంగా పూర్తిగా పునరుద్ధరించనున్నారు. ప్రధాన ఆధునికీకరణలో క్లబ్-ఎస్ క్షిపణి వ్యవస్థ (కాలిబర్ క్షిపణుల ఎగుమతి వెర్షన్) ఏకీకరణ ఉంది. ఇది టార్పెడో గొట్టాల ద్వారా 220 నుంచి 300 కిలోమీటర్ల పరిధిలో భూమి, శత్రు నౌకల లక్ష్యాలను ఛేదించగల సామర్థ్యాన్ని కలిగి ఉంటుంది. అంతేకాకుండా, తక్కువ గుర్తింపు కలిగిన స్టెల్త్ పూతలు, ఆటోమేటెడ్ పెరిస్కోప్ వ్యవస్థలు,మెరుగైన ఓర్పు కోసం ఆధునిక లిథియం-అయాన్ బ్యాటరీలు కూడా ఈ రిఫిట్ ప్యాకేజీలో భాగంగా ఉండనున్నాయి.

వాస్తవానికి, జూలై 2025లో రష్యా ఆరు జలాంతర్గాముల ఒప్పందాన్ని ప్రతిపాదించింది. అయితే భారతదేశం యొక్క తక్షణ ఆర్థిక పరిస్థితులు, కార్యాచరణ అవసరాలను దృష్టిలో ఉంచుకుని, ఈ ప్రతిపాదనను ఇప్పుడు మూడు జలాంతర్గాములకు పరిమితం చేశారు.

ప్రస్తుతం భారత నావికాదళంలో 16 సాంప్రదాయ జలాంతర్గాములు మాత్రమే ఉన్నాయి. వీటిలో ఏడు రష్యన్ సింధుఘోష్-క్లాస్ (కిలో), నాలుగు జర్మన్ HDW శిషుమార్-క్లాస్, ఆరు ఫ్రెంచ్ రూపకల్పన చేసిన కల్వరి-క్లాస్ (స్కార్పీన్) నౌకలు ఉన్నాయి. 1986 నుంచి 2000 మధ్య కొనుగోలు చేసిన కిలో-క్లాస్ జలాంతర్గాములు వయస్సు కారణంగా నిర్వహణ సవాళ్లను ఎదుర్కొంటున్నాయి. 2017 నుంచి 2022 మధ్య INS సింధు రక్షక్, సింధువీర్, సింధుధ్వజ్ వంటి మూడు కిలో-తరగతి జలాంతర్గాములు పదవీ విరమణ చేయడం నావికాదళంపై అదనపు ఒత్తిడిని తెచ్చింది. ఆ తాజా ప్రతిపాదన హిందూ మహాసముద్ర ప్రాంతంలో సముద్ర భద్రతను బలోపేతం చేయడంలో ఇది ఒక వ్యూహాత్మక ముందడుగుగా నిపుణులు అభిప్రాయపడుతున్నారు.