డాలరుతో పడిపోతున్న రూపాయి విలువ: రికార్డ్ 73ను దాటి...

యూఎస్ డాలరుతో రూపాయి మారకం విలువ పడిపోతోంది. మంగళవారం భారీగా నష్టపోయి 73.29 వద్ద ముగిసింది. కరోనా వైరస్, ఫెడరల్ రిజర్వ్ బ్యాంక్ వడ్డీ రేటు కోత నిర్ణయం ప్రభావం పడింది. క్రూడాయిల్ ధరలు పెరగడంతో నిన్న కీలకమైన 73 స్థాయికి క్షీణించింది. తద్వారా 16 నెలల కనిష్టానికి పడిపోయింది.

బుధవారం డాలరు మారకంతో రూపాయి 22 పైసలు ఎగిసి 73.07 వద్ద ట్రేడింగ్‌ను ప్రారంభించింది. కరోనా వైరస్ కారణంగా రూపాయి వరుసగా మూడో రోజు కూడా నష్టపోయింది. సోమవారం నుండి బుధవారం వరకు మొత్తం 160 పైసలు పడిపోయింది.

దేశీయ ఈక్విటీ మార్కెట్లో అమ్మకాల నేపథ్యంలో ఇంట్రాడేలో రూపాయి 73.63 కనిష్టానికి పడిపోయింది. ఆసియా దేశాల కరెన్సీలో భారీగా నష్టపోతోంది భారత కరెన్సీ. భారత్‌లో కరోనా కేసులు పెరుగుతుండటంతో మార్కెట్లపై, రూపాయిపై భారీగా ప్రభావం చూపుతోంది.

ఐఎన్జీ బ్యాంకు ఎన్వీ ప్రకారం కరోనా వైరస్ ప్రభావం ఆందోళనలు ఇలాగే కొనసాగితే త్వరలో డాలరు మారకంతో రూపాయి 75కు కూడా పడిపోవచ్చునని అంచనా. అక్టోబర్ 2018 రికార్డ్‌ను అధిగమిస్తుంది. ఇప్పటికే కరెన్సీ బుధవారం నాడు ఏడాది కనిష్టానికి పడిపోయింది.