RBI Monetary Policy: వరుసగా మూడోసారి... వడ్డీ రేటు యథాతథం

ముంబై: రిజర్వ్ బ్యాంక్ ఆఫ్ ఇండియా(RBI) వరుసగా మూడోసారి కీలక వడ్డీ రేట్లలో మార్పులు చేయలేదు. ద్రవ్యోల్భణం పెరగడం, జీడీపీ ప్రతికూలంగానే ఉండటం వంటి వివిధ కారణాలతో ఆర్బీఐ రెపో రేటును యథాతథంగా నాలుగు శాతంగా ఉంచింది. రివర్స్ రెపో రేటు 3.35 శాతంగా ఉంది. బ్యాంకు రేటు 4.25 శాతంగా కొనసాగనుంది. ద్వైమాసిక ద్రవ్య పరపతి విధాన సమీక్ష నిర్ణయాలను ఆర్బీఐ శుక్రవారం ప్రకటించింది.

ద్వైపాక్షిక పరపతి విధాన సమీక్షలో భాగంగా ఆర్బీఐ గవర్నర్ శక్తికాంత దాస్ నేతృత్వంలో ఎంపీసీ మూడు రోజులపాటు సమావేశమైంది. ఇందులో భాగంగా యథాతథ పాలసీ అమలుకే కట్టుబడుతున్నట్లు ఏకగ్రీవంగా ప్రకటించింది. దీంతో రెపో రేటు నాలుగు శాతం వద్ద, రివర్స్ రెపో రేటు 3.35 శాతం వద్ద కొనసాగనుంది.

2020-21 ఆర్థిక సంవత్సరానికి గాను జీడీపీపై తొలుత వేసిన మైనస్ 9.5 శాతం క్షీణత అంచనాలను తాజాగా సవరించింది. మైనస్ 7.5 శాతంగా అంచనా వేసింది. ప్రస్తుత ఆర్థిక సంవత్సరం రెండో అర్ధ సంవత్సరం అక్టోబర్-మార్చి కాలంలో ఆర్థిక వ్యవస్థ సానుకూలవృద్ధిని సాధించనుందని భావించింది. డిసెంబర్ త్రైమాసికంలో వృద్ధి 0.1 శాతంగా ఉండవచ్చునని భావిస్తోంది. అంతకుముందు మైనస్ 5.6 శాతంగా అంచనా వేసింది. మార్చి త్రైమాసకం వృద్ధి రేటు అంచనాలను 0.7 శాతం నుండి 0.7 శాతానికి పెంచింది.